भाजप नगरसेविकेची शिवसेना महिला पदाधिकाऱ्यास शिवीगाळ, व्हिडिओ व्हायरल

मीरा रोड : भाईंदर पश्चिमेस मुर्धा रेव आगर भागात महापालिकेच्या वतीने केल्या जाणाऱ्या कीटकनाशक फवारणीच्या श्रेयवादातून भाजपच्या स्थानिक नगरसेविकेने शिवसेना महिला उपशहर संघटक तेजस्वी पाटील यांना अश्लील अपशब्द वापरून शिवीगाळ केल्याचा व्हिडिओ व्हायरल झाला.

राई गावात राहणाऱ्या शिवसेना महिला उपशहर संघटक पाटील यांनी पावसाळा सुरू झाल्याने डासांचा प्रादुर्भाव वाढल्याने राई, मुर्धा, मोरवा भागात कीटकनाशक फवारणी करण्याची विनंती पत्राद्वारे महापालिकेसह आमदार गीता जैन यांना केली होती.

शुक्रवारी मुर्धा रेव आगर झोपडपट्टीत पालिकेने कीटकनाशक फवारणी सुरू केली असता तेजस्वी उपस्थित होत्या. सदर प्रकार नगरसेविका नयना यांना कळताच त्यांनी जोरदार भांडण करत तेजस्वी यांना अश्लील अपशब्द वापरत शिवीगाळ केली. मी इकडची नगरसेविका आहे, तुझे इथे काय काम आदी मोठ्याने आरडाओरडा करत विचारणा केली.

तोच शनिवारी राई गावात कीटकनाशके फवारणीच्या कामाचा व्हिडिओ समाज माध्यमांवर लाइव्ह केला म्हणून स्थानिक भाजप नगरसेवक विनोद म्हात्रे यांनी तेजस्वी यांना जाब विचारला. त्यावेळी सुद्धा विनोद व तेजस्वी यांच्यात थेट फेसबुकवर लाइव्ह वादंग झाल्याने त्याबाबत चर्चा रंगली.

...............