चिंचोटी-माणकोली रस्त्याच्या दुरवस्थेविरोधात गाव विकास समितीचा रास्ता रोको

भिवंडी : भिवंडीतील मानकोली अंजुरफाटा ते चिंचोटी महामार्गाच्या झालेल्या दुरवस्थेविरोधात गाव विकास समितीने बुधवारी खारबाव, कालवार व कामण या ठिकाणी रास्ता रोको आंदोलन केले. महामार्गावरील सुमारे दहा ते बारा गावांतील स्थानिकांनी या आंदोलनात भाग घेतला होता. यामुळे खारबाव परिसरात प्रचंड वाहतूककोंडी होऊन सुमारे चार ते पाच किलोमीटरपर्यंत लांब वाहनांच्या रांगा लागल्या होत्या.

माणकोली-अंजुरफाटा-चिंचोटी या राज्य महामार्गाची सध्या प्रचंड दुरवस्था झाली असून, सध्या हा रस्ता मृत्यूचा सापळा बनला आहे. अनेक वर्षांपासून या रस्त्यावरून नागरिकांना जीव मुठीत धरूनच प्रवास करावा लागत आहे. विशेष म्हणजे या रस्त्याची जबाबदारी असलेल्या सुप्रिम कंपनीबरोबरच सार्वजनिक बांधकाम विभागाच्या अधिकाऱ्यांचे याकडे दुर्लक्ष होत आहे. या रस्त्यांवरील खड्ड्यांमुळे अनेक अपघात होत असून, त्यात अनेकांचा जीव गेला आहे.

सुप्रिम कंपनी व सार्वजनिक बांधकाम विभागाच्या अधिकाऱ्यांच्या रस्त्याबाबत दुर्लक्षित धोरणामुळे स्थानिक गावकऱ्यांनी एकत्र येऊन सर्वपक्षीय गाव विकास संघर्ष समिती स्थापन केली असून, तिच्या वतीने बुधवारी सकाळी ११ वाजता तीन वेगवेगळ्या ठिकाणी हे रास्ता रोको आंदोलन करण्यात आले.

विशेष म्हणजे रस्ता लवकरात लवकर दुरुस्त करा, जोपर्यंत तो दुरुस्त होत नाही तोपर्यंत टोलनाका बंद करा, अपघाती मृत्यू, जखमी व कायमस्वरूपी अपंगत्व आलेल्या नागरिकांना आर्थिक मदत करा, अशा मागण्या यावेळी आंदोलकांनी केल्या. खारबाव येथे प्रचंड वाहतूककोंडी झाल्याने कायदा व सुव्यवस्थेचा प्रश्न पुढे करून पोलिसांनी आंदोलन स्थगित करण्यासाठी पुढाकार घेतल्याने आंदोलकांनी दीड तास रोखून धरलेला रस्ता सुरळीत केला.

* सुप्रिम कंपनीसह सा. बां.विरोधात संताप

पूर्वनियोजित असलेल्या या आंदोलनाकडे सार्वजनिक बांधकाम विभागाच्या अधिकाऱ्यांबरोबरच टोल वसूल करणाऱ्या सुप्रिम कंपनीच्या अधिकाऱ्यांनी पाठ फिरविल्याने आंदोलकांनी सार्वजनिक बांधकाम विभाग व टोल प्रशासनाविरोधात तीव्र नाराजी व्यक्त करून पोलिसांसमोर आपला राग व संताप व्यक्त केला.