टिटवाळा येथे रेल्वे रुळांजवळ आढळला बेपत्ता सीएचा मृतदेह

टिटवाळा रेल्वे रुळांजवळ एका व्यक्तीचा मृतदेह १२ आॅक्टोबरला आढळला होता. रेल्वे पोलिसांनी या प्रकरणी आकस्मिक मृत्यूची नोंद केली होती.

कल्याण : आर्थिक गुन्हे शाखेकडून चौकशी सुरू असलेल्या ‘कॉक्स अ‍ॅण्ड किंग्स’ या कंपनीच्या सीएचा मृतदेह टिटवाळा येथे रुळांजवळ आढळून आला आहे. सागर सुहास देशपांडे असे त्यांचे नाव असून, ते ठाण्याला राहत होते. ११ आॅक्टोबरपासून ते बेपत्ता होते. दरम्यान, त्यांचा मृतदेह रेल्वेरुळांजवळ आढळल्याने त्यांनी आत्महत्या केली का? ही दुर्घटना आहे की घातपात, या तिहेरी अंगाने कल्याणरेल्वे पोलीस या प्रकरणाचा तपास करीत आहेत.

टिटवाळा रेल्वे रुळांजवळ एका व्यक्तीचा मृतदेह १२ आॅक्टोबरला आढळला होता. रेल्वे पोलिसांनी या प्रकरणी आकस्मिक मृत्यूची नोंद केली होती. या प्रकरणाचा त्यांनी तपास सुरू केला होता. या मृतदेहाची ओळख पटविण्यासाठी त्यांनी मृतदेहाचे फोटो सगळीकडे पाठविले होते. अखेर, पोलिसांना मृतदेहाची ओळख पटली. 

दरम्यान, सागर हे ‘कॉक्स अ‍ॅण्ड किंग्स’ या कंपनीचे सीए होते. ११ आॅक्टोबरला टिटवाळ्याला जात असल्याचे त्यांनी त्यांच्या घरी सांगितले. ते तेव्हा घराबाहेर पडले, ते पुन्हा घरी परतलेच नाहीत. त्यामुळे त्यांच्या कुटुंबीयांनी ते बेपत्ता झाले असल्याची तक्रार पोलीस ठाण्यात नोंदविली होती.