'ओएलएक्स'वर पुस्तकं विकणं पडलं महागात

‘गुगल पे’द्वारे ७९ हजार ९८० रुपयांची फसवणूक

कल्याण : ‘ओएलएक्स’द्वारे पुस्तके विकणे एकाला चांगलेच महागात पडले आहे. भारतीय सैन्यात असल्याची बतावणी करत पुस्तके खरेदी करण्याचे सांगत एका भामट्याने ‘गुगल पे’द्वारे ७९ हजार ९८० रुपये काढून घेत त्याची फसवणूक केल्याची घटना कल्याण पश्चिमेत घडली.

दुधनाका परिसरात राहणारे संजय प्रभू (५५) यांचा मुलगा सूरज याने दोन महिन्यांपूर्वी ‘ओएलएक्स’वर काही जुन्या वस्तू विकण्यासंदर्भात माहिती पोस्ट केली होती. २५ डिसेंबरच्या दुपारी पवनकुमारने सूरजला फोन करून पुस्तके विकत घ्यायची असल्याचे सांगितले. त्यावर पुस्तके २०० रुपयांना विकणार असल्याचे त्याने पवनकुमारला सांगितल्यानंतर त्याने त्यास होकार दर्शविला. आपण भारतीय सैन्यात कामाला असून, सध्या ठाण्यात राहात असल्याचे पवनकुमारने सूरजला सांगितले. प्रति पुस्तक २२० रुपयांना खरेदी केले जाईल. तसेच माझा मुलगा घरी येऊन ही पुस्तके घेऊन जाईल, असेही त्याने सांगितले. त्यानंतर, पवनकुमारने सूरजकडे ‘गुगल पे’चे खाते आहे का, अशी विचारणा केली. तेव्हा माझ्या वडिलांकडे ‘गुगल पे’ असल्याचे सूरजने सांगत त्यांचा नंबर पवनकुमारला दिला.

पवनकुमारने पैसे पाठवल्याचे सांगत क्युआर कोड स्कॅन केल्यानंतर तुम्हाला पैसे मिळतील, असे सांगितले. त्याच्या म्हणण्यानुसार सूरजने क्युआर कोड स्कॅन केला असता पुढे जाण्याचा पर्यायावर क्लिक करण्यास पवनकुमारने सांगितले. त्यानंतर प्रभू यांच्या बँक खात्यातून २२० रुपये आणि १९ हजार ९९५ रुपये वजा झाले. सूरजने पवनकुमारला विचारले असता, यूपीआयचा पीन प्रविष्ट केल्यावर पैसे मिळतील, असे सांगितले. त्याच्या म्हण्यानुसार सूरजने केले असता पुन्हा १९ हजार ९९५ रुपये वजा झाले. या सर्व प्रकारामुळे घाबरलेल्या सूरजने आपले पैसे परत मिळतील या अपेक्षेने पवनकुमार सांगत असलेली कृती करत राहिला. असे केल्याने प्रभू यांच्या बँक खात्यातून एकूण ७९ हजार ९८० रुपये काढून घेतल्याचे सूरजच्या निदर्शनास आले. याप्रकरणी प्रभू यांनी रविवारी बाजारपेठ पोलिसात तक्रार दिली.