तेली हल्लाप्रकरणी दोघांना अटक

बदलापूरचे उपनगराध्यक्ष शरद तेली यांच्यावर झालेल्या हल्ल्याप्रकरणी पोलिसांनी राम लिये व प्रेम चव्हाण या दोघांना अटक केली आहे

बदलापूर : बदलापूरचे उपनगराध्यक्ष शरद तेली यांच्यावर झालेल्या हल्ल्याप्रकरणी पोलिसांनी राम लिये व प्रेम चव्हाण या दोघांना अटक केली आहे. त्यांचा एक साथीदार फरार असून पोलीस त्याचा शोध घेत आहेत.
२८ जानेवारीला सायंकाळी तेली यांच्यावर अनोळखी व्यक्तीने तलवारीने हल्ला केला. सुदैवाने हल्ल्यात तलवारीची धार नसलेली बाजू मानेवर लागल्याने ते थोडक्यात बचावले. हल्ल्यानंतर हल्लेखोर तलवार टाकून पळून गेला होता. त्यामुळे या हल्ल्याविषयी अनेक तर्कवितर्क काढले जात होते.
बदलापूर पश्चिम पोलिसांनी या प्रकरणाचा सर्व बाजंूनी तपास सुरू केला होता. हा तपास सुरू असतानाच वरिष्ठ पोलीस निरीक्षक जितेंद्र आगरकर यांना या प्रकरणाची माहिती मिळाली. त्यानुसार, पोलिसांनी गुलबर्गा येथे जाऊन प्रेम चव्हाण याला ताब्यात घेतले. त्याची कसून चौकशी केली असता त्याने राम लिये याच्या सांगण्यावरून हा हल्ला केल्याची कबुली दिली. त्यानुसार, पोलिसांनी राम यालाही अटक केली. त्यांचा एक साथीदार अद्याप फरार असून पोलीस शोध घेत आहेत. (प्रतिनिधी)
राजकीय वादातून हल्ला?
उपनगराध्यक्ष शरद तेली यांच्यावर झालेला हल्ला राजकीय वादातून झाल्याची माहिती पुढे आली असून वरिष्ठ पोलीस निरीक्षक जितेंद्र आगरकर अधिक तपास करत आहेत.