उल्हासनगर महापालिकेच्या मोफत लाकडे योजनेला ब्रेक?

सदानंद नाईक

लोकमत न्यूज नेटवर्क

उल्हासनगर : गोरगरीब व गरजू नागरिकांना अंत्यसंस्कारासाठी मोफत लाकडे देण्याची महापालिकेची योजना आहे, मात्र गेल्या आठ महिन्यांपासून लाकडाचे पैसे महापालिकेने स्मशानभूमी ट्रस्टला दिले नसल्याने, योजनेला ब्रेक लागण्याची शक्यता निर्माण झाली आहे. यामुळे ट्रस्ट आर्थिक संकटात सापडल्याची प्रतिक्रिया स्मशानभूमीचे ट्रस्टी मेघराज लुंड यांनी दिली.

उल्हासनगरातील गोरगरीब व गरजू नागरिकांच्या नातेवाईकांना अंत्यसंस्काराला मोफत लाकडे देण्याचा निर्णय महापालिकेने घेऊन सर्वसामान्य नागरिकांना दिलासा दिला. एका अंत्यसंस्काराला एकूण १६०० रुपये खर्च येतो. त्यातील लाकडाचे एक हजार रुपये महापालिका स्मशानभूमी ट्रस्टला परस्पर देणार असा निर्णय घेण्यात आला. सुरुवातीला महापालिका नियमित लाकडाचे पैसे देत असल्याने, अडचण आली नाही. मात्र गेल्या दीड वर्षापासून लाकडाचे नियमित पैसे मिळत नसल्याने, स्मशानभूमी ट्रस्ट आर्थिक अडचणीत सापडला आहे. गेल्या आठ महिन्यांपासून मोफत लाकडाचे पैसे महापालिकेकडून मिळाले नसल्याची माहिती म्हारळगाव व शांतीनगर स्मशानभूमी ट्रस्टचे अध्यक्ष मेघनाथ लुंड यांनी दिली.

शहरातील कॅम्प नं-२ येथील म्हारळगाव खदान, कॅम्प नं-३ येथील शांतीनगर स्मशानभूमी ट्रस्टने गेल्या चार महिन्यापूर्वी प्रत्येकी ३०० जणांचे फॉर्म महापालिका आरोग्य विभागात भरले. त्याचे प्रत्येकी ९ लाख रुपये येणे बाकी आहे. ३०० फॉर्मचे पैसे मिळत नाहीत, तोपर्यंत इतर फॉर्मचे बिल महापालिका स्वीकारत नसल्याने, दोन्ही स्मशानभूमीकडे प्रत्येकी ६०० पेक्षा जास्त फॉर्म जमा करण्याऐवजी पडून आहेत, अशी माहिती ट्रस्टचे अध्यक्ष मेघनाथ लुंड यांनी दिली. तर कॅम्प नं-४ व ५ मधील स्मशानभूमी ट्रस्टने प्रत्येकी ३०० फॉर्म महापालिका आरोग्य विभागाकडे भरून प्रत्येकी ४०० फॉर्म पूर्वीच्या फॉर्मचे पैसे न मिळाल्याने, ते ट्रस्टकडे पडून असल्याचे लुंड म्हणाले. गेल्या ८ महिन्यापासून अंत्यसंस्काराला देण्यात आलेल्या मोफत लाकडाचे पैसे न मिळाल्याने, ट्रस्ट आर्थिक अडचणीत आला आहे.

कॅम्प नं-१, ३ व ५ मधील स्मशानभूमीत ६० टक्के नागरिक मोफत लाकडाचा लाभ घेतात. तर कॅम्प नं-४ मध्ये ८० टक्के नागरिक मोफत लाकडाचा लाभ घेतात. अंत्यसंस्काराला लागणाऱ्या लाकडाची खरेदी पावसाळ्यापूर्वी केल्यास, सुकी लाकडे असतात. मात्र पैशाअभावी लाकडे खरेदी करण्यात अनियमितता येत असल्याने, नागरिकांना ओली लाकडे दिली जातात. यामुळे नागरिकांच्या रोषालाही स्मशानभूमी ट्रस्ट सामोरे जात आहे. महापालिकेच्या आडमुठ्या धोरणामुळे गोरगरीब व गरजू नागरिकांना मोफत लाकडे द्यावी का? असा प्रश्न स्मशानभूमी ट्रस्टसमोर निर्माण झाल्याची प्रतिक्रिया लुंड यांनी दिली.

----------

मोफत लाकडाचे पैसे लवकरच देणार

स्मशानभूमी ट्रस्टकडून अंत्यसंस्कारसाठी पुरविण्यात आलेल्या मोफत लाकडाचे बिल मिळाले. बिल देण्यासाठी लेखा विभागाकडे पाठविल्याची माहिती वैद्यकीय अधिकारी दिलीप पगारे यांनी दिली. तसेच त्यांची इतर बिलेही लवकरच देण्याचे संकेत पगारे यांनी दिले.