सरकारी कामात अडथळा आणणाऱ्या दाम्पत्यावर गुन्हा दाखल

मीरा रोड : गृहनिर्माण संस्थेवर नेमलेला प्रशासक बदला, या मागणीकरिता भाईंदर येथील उपनिबंधक सहकारी संस्थेच्या कार्यालयात जाऊन धुडगूस घालत धमक्या देणाऱ्या एका दाम्पत्याविरुद्ध भाईंदर पोलीस ठाण्यात बुधवारी गुन्हा दाखल करण्यात आला.

भाईंदर पश्चिमेला असलेल्या उपनिबंधक सहकारी संस्था कार्यालयात मीरा रोडच्या जांगीड कॉम्प्लेक्समधील गंगोत्री गृहनिर्माण संस्थेतील भावना मंडोरा व त्यांचे पती राजेश मंडोरा सायंकाळी ५ वा.च्या सुमारास गेले. कार्यालयातील उपनिबंधक सतीश देवकते यांच्या दालनात हे दाम्पत्य शिरले. आमच्या सोसायटीचे प्राधिकृत प्रशासक अधिकारी श्रद्धा संदीप कदम यांच्याऐवजी अलिहैदर शेख यांची नियुक्ती का केली, अशी विचारणा करून देवकते यांच्याशी वाद घालणे सुरू केले. आरडाओरडा करून भावना व राजेश यांनी जोपर्यंत तुम्ही शेख यांच्या नियुक्तीचा आदेश रद्द करत नाहीत, तोपर्यंत तुम्हाला बाहेर जाऊ देणार नाही, असे धमकावत देवकते यांना कार्यालयाबाहेर जाण्यापासून अडवले व कार्यालयातील कामात अडथळा आणला. तसेच कार्यालयातील कागदपत्रे जाळून टाकण्याची धमकी दिली. भावना व राजेश मंडोरा यांच्याविरुद्ध सरकारी कामात अडथळा आणल्याबद्दल भाईंदर पोलीस ठाण्यात गुन्हा दाखल करण्यात आला.

.......

वाचली