मुलीच्या मृत्यूप्रकरणी गृहनिर्माण संस्थेच्या पदाधिकाऱ्यांवर गुन्हा दाखल

मीरारोडच्या एका वसाहतीच्या  बगिच्यात खेळणाऱ्या 11 वर्षाच्या मुलीचा विजेच्या धक्क्याने झालेल्या मृत्यूबाबत पोलिसांनी गृहनिर्माण संस्थेच्या पदाधिकाऱ्यां विरोधात हलगर्जीपणा मुळे मृत्यूस कारणीभूत ठरल्या प्रकरणी गुन्हा दाखल केला आहे .

मीरारोड - मीरारोडच्या एका वसाहतीच्या  बगिच्यात खेळणाऱ्या 11 वर्षाच्या मुलीचा विजेच्या धक्क्याने झालेल्या मृत्यूबाबत पोलिसांनी गृहनिर्माण संस्थेच्या पदाधिकाऱ्यां विरोधात हलगर्जीपणा मुळे मृत्यूस कारणीभूत ठरल्या प्रकरणी गुन्हा दाखल केला आहे . 

शनिवारी रात्री पाऊस पडला होता . त्या दरम्यान मीरारोडच्या बेव्हर्ली पार्क भागात सॅण्ड स्टोन गृह संकुलातील बगिच्यात लहान मुलं खेळायला गेली . बगिच्याचे लोखंडी जाळीचे दाराला हात लावताच  श्रुती राम यादव ( 11 )  हिचा विजेचा जबर धक्का लागून जागीच मृत्यू झाला होता . तर श्रद्धा सुरेंद्र कनोजिया ( 12 )  सह अन्य दोन मुलं देखील विजेच्या धक्क्याने जखमी झाले होते . श्रद्धा हिला रुग्णालयात दाखल केले होते .

मीरारोड पोलिसांनी या प्रकरणी अकस्मात मृत्यूची नोंद केली होती . तर रिलायन्स एनर्जीचा पथकाने येऊन पाहणी केली होती . दरम्यान विजेचा प्रवाह लोखंडी जाळीत कसा व कुठून आला याची माहिती मिळवण्यासाठी पोलिसांनी सार्वजनिक बांधकाम विभागातील अधिकाऱ्यास पाचारण केले होते . बगिच्यात रोषणाई करण्यात आली होती . तर मोठा एलईडी दिवा लावण्यासाठी लोखंडी खांब उभारण्यात आला होता . काही वायरीचे तुकडे झाले होते . 

दरम्यान श्रुतीच्या मृत्यू प्रकरणी तिच्या वडिलांनी मीरारोड पोलिसांना फिर्याद दिली . सोसायटीच्या पदाधिकाऱ्यांना सुमारे 6 महिने आधी विजेचा धक्का लागत असल्याने खबरदारी घेऊन दुरुस्ती करून घेण्यास सांगितले होते . पण त्यांनी दुर्लक्ष केल्याने आपल्या मुलीचा मृत्यू झाल्याचे यादव म्हणाले . फिर्यादी नुसार पोलिसांनी गृहनिर्माण संस्थेचे अध्यक्ष , सचिव व खजिनदार यांच्या विरोधात मृत्यूस कारणीभूत ठरल्या प्रकरणी गुन्हा दाखल केला आहे . वरिष्ठ निरीक्षक वसंत लब्दे यांच्या मार्गदर्शनाखाली उपनिरीक्षक नरेंद्र कोरे पुढील तपास करत आहेत .