यंदाचा गणेशोत्सव साध्या पद्धतीने साजरा करा

ठाणे : कोविड १९ मुळे उद्भवलेल्या संसर्गजन्य परिस्थितीचा विचार करून या वर्षी गणेशोत्सव साध्या पद्धतीने साजरा करण्याचा निर्णय शासनाने घेतला आहे. त्यानुसार ठाणेकरांनी गणेशोत्सव साध्या पद्धतीने साजरा करावा. याबाबत महापालिकेने जारी केलेल्या मार्गदर्शक सूचनांचे पालन करण्याचे आवाहन महापालिका आयुक्त डॉ. विपिन शर्मा यांनी केले आहे. घरगुती तसेच सार्वजनिक गणपतींची सजावट साधी तसेच गणेशमूर्ती सार्वजनिक मंडळासाठी चार फूट व घरगुती गणपतीसाठी दाेन फुटांच्या मर्यादेत असावी. तसेच शक्यतो पारंपरिक गणेशमूर्तीऐवजी घरातील धातू, संगमरवर मूर्तीचे पूजन करावे, असे मार्गदर्शक सूचनांमध्ये नमूद केले आहे.

मूर्ती शाडूची पर्यावरणपूरक असल्यास तिचे विसर्जन घरच्या घरी करावे. विसर्जन घरी शक्य नसल्यास ते कृत्रिम स्थळी करण्याचे आवाहन महापालिकेच्या वतीने केले आहे. वर्गणी, देणगी स्वेच्छेने दिल्यास त्यांचा स्वीकार करावा. जाहिरातींमुळे गर्दी होणार नाही याची खबरदारी घ्यावी. तसेच आरोग्य व सामाजिक संदेश असणाऱ्या जाहिराती प्रदर्शित करण्यास प्राधान्य द्यावे. त्याचप्रमाणे आरोग्यविषयक उपक्रम, शिबिरे घ्यावीत. त्याद्वारे कोरोना, मलेरिया, डेंग्यू आदी आजारांबाबत प्रतिबंधात्मक उपाय आणि स्वच्छतेबाबत जनजागृती करण्यावर भर देण्याचे महापालिकेने सूचित केले आहे. शासनाने लागू केलेल्या ‘लेवल ऑफ रेस्ट्रिक्शन फॉर ब्रेकिंग द चेन’बाबत वेळोवेळी निर्गमित केलेल्या परिपत्रकानुसार इतर निर्बंध कायम राहतील. आरती, भजन, कीर्तन वा अन्य धार्मिक कार्यक्रम आयोजित करताना गर्दी होणार नाही याची दक्षता घ्यावी. तसेच ध्वनिप्रदूषणासंदर्भातील नियम व तरतुदींचे काटेकोर पालन करण्यात यावे. श्रीगणेश दर्शनाची ऑनलाइन व्यवस्था करण्याच्या सूचनाही देण्यात आल्या आहेत.

मंडपात निर्जंतुकीकरण, थर्मल स्क्रीनिंग आवश्यक

गणपती मंडपात निर्जंतुकीकरण, तसेच थर्मल स्क्रीनिंगची पर्याप्त व्यवस्था असायला हवी. प्रत्यक्ष दर्शन घेणाऱ्या भाविकांसाठी शारीरिक अंतर आणि स्वच्छतेचे नियम (मास्क, सॅनिटायझर इत्यादी) पाळण्याकडे विशेष लक्ष देण्यात यावे. श्रींच्या आगमन व विसर्जन मिरवणुका काढण्यात येऊ नयेत. विसर्जनाच्या पारंपरिक पद्धतीत विसर्जनस्थळी होणारी आरती घरीच करून विसर्जनस्थळी कमीतकमी वेळ थांबावे. लहान मुले आणि वरिष्ठ नागरिकांनी सुरक्षेच्या दृष्टीने विसर्जनस्थळी जाणे टाळावे. संपूर्ण चाळीतील, इमारतीतील सर्व घरगुती गणेशमूर्तींच्या विसर्जनाची मिरवणूक काढू नये, असेही पालिकेने म्हटले आहे.