"चंद्रशेखर बावनकुळे वेस्ट इंडीजच्या 'लारा'सारखे नाही, तर 'या' खेळाडूसारखे दिसतात"

उद्धव ठाकरेंनी देवेंद्र फडणवीस यांच्यावर घणाघाती टीका केली होती. फडतूस गृहमंत्री असल्याचं सांगत ठाकरेंनी उपमुख्यमंत्री देवेंद्र फडणवीसांना ठाणे प्रकरणातील मारहाणीवरुन लक्ष्य केलं होतं.

ठाणे - शिवसेनेत फूट पडल्यानंतर एकनाथ शिंदे गटाने भाजपसोबत जाऊन संसार थाटला आहे. जवळपास ५० आमदारांना सोबत घेत राज्याच्या मुख्यमंत्रीपदी एकनाथ शिंदे विराजमान झाले. सत्तासंघर्षाच्या या लढाईत शिवसेना विरुद्ध शिवसेना आणि ठाकरे गट विरुद्ध भाजपा असा सामना रंगला आहे. त्यातच, भाजप प्रदेशाध्यक्ष चंद्रशेखर बावनकुळे यांनी पक्षप्रमुख उद्धव ठाकरेंना घराबाहेर न पडू देण्याचा इशारा दिला होता. त्यावरुन, आता त्यांच्यावर शिवसेना ठाकरे गटाचे आमदार पलटवार करत आहेत. उद्धव ठाकरेंवरील टीकेला प्रत्त्युत्तर देताना आमदार देशमुख यांनी बावनकुळे यांना मतिमंद म्हटलं, तर भास्कर जाधव यांनी थेट वेस्ट इंडिजच्या खेळाडूसोबतच त्यांची तुलना केलीय. 

उद्धव ठाकरेंनी देवेंद्र फडणवीस यांच्यावर घणाघाती टीका केली होती. फडतूस गृहमंत्री असल्याचं सांगत ठाकरेंनी उपमुख्यमंत्री देवेंद्र फडणवीसांना ठाणे प्रकरणातील मारहाणीवरुन लक्ष्य केलं होतं. त्यानंतर, भाजप नेते ठाकरे गटावर आणि उद्धव ठाकरेंवर शाब्दीकरित्त्या तुटून पडले. त्यावेळी, चंद्रशेखर बावनकुळे यांनी थेट इशाराच दिला होता. उद्धव ठाकरेंनी मर्यादा सोडली तर आम्हीही ऐकणार नाही. तुम्ही आमच्या नेत्यांना बोलणार असाल तर आम्ही सोडणार नाही. आज तुम्हाला शेवटची वॉर्निंग देत आहे. यापुढे फडणवीसांबाबत काही बोललात तर तुम्हाला घराबाहेरही पडू देणार नाही, असा थेट इशारा भाजपाचे प्रदेशाध्यक्ष चंद्रशेखर बावनकुळे यांनी उद्धव ठाकरेंना दिला होता. त्यावर, आता आमदार देशमुख यांच्यानंतर आता भास्कर जाधव यांनीही बोचरी टीका केलीय. ठाण्यातील सभेत बोलताना त्यांनी थेट वेस्ट इंडिजच्या खेळाडूसोबत त्यांची तुलना केलीय.

चंद्रशेखर बावनकुळे हे आहेत महाराष्ट्राचे मात्र दिसतात वेस्ट इंडीजच्या खेळाडूसारखे, असे म्हणत ठाकरे गटाचे आमदार भास्कर जाधव यांनी भाजप प्रदेशाध्यक्ष चंद्रशेखर बावनकुळे यांच्यावर बोचरी टीका केली. पक्षप्रमुख उद्धव ठाकरेंवर केलेल्या टीकेला प्रत्युत्तर देताना जाधव यांनी बावनकुळे यांच्या दिसण्यावरुन टीकास्त्र सोडले.  

यावेळी, पुढे बोलताना भास्कर जाधव म्हणाले, विवियन रिचर्ड मजबूत होता, चंद्रशेखर बावनकुळे पॅट्रिक पॅटरसनसारखा दिसतो का तर नाही, ब्रायन लारसारखो दिसतो का नाही मग तो कोणासारखो दिसतो तर वेस्ट इंडीजचा खेळाडू अ‍ॅम्ब्रोससारखा तो दिसतो, हे लक्षात आले. जुन्या लोकांना माहित आहे अ‍ॅम्ब्रोस कसे होते. नाहीतर बावनकुळे त्यांना रागवायचे, असे म्हणत जाधव यांनी चंद्रशेखर बावनकुळे यांच्यावर बोचरी टीका केली. यावेळी, इतर उपस्थितांनी हसत-हसत भाषणाला दाद दिली. 

तुम्ही वेस्ट इंडीजच्या खेळाडूसारखे दिसतात. मात्र ते खेळाडू होते, ते खेळतही होते. पण, तुम्ही कोणासोबत खेळताय, उद्धव ठाकरेंबरोबर. उद्धव ठाकरे तुम्हाला एका बॉलवर आऊट करतील, पत्ता सुद्धा लागणार नाही. असे म्हणत भास्कर जाधव यांनी बावनकुळेंवर पलटवार केला. 

नितीन देशमुख यांचीही घणाघाती टीका 

''बावनकुळे यांची औकात काय आहे? त्यांनी मातोश्रीच्या बाहेर जाऊन उद्धव ठाकरे यांना रोखून दाखवावे. खरे दूध न पिलेला माणूस म्हणजे बावनकुळे आहे. त्यांच्याकडे पाहिले तर ते एक मतिमंद असलेला माणूस दिसतात. मतिमंद माणसाने अशी भाषा बोलू नये.'', अशा शब्दात आमदार देशमुख यांनी चंद्रशेखर बावनकुळे यांच्यावर घणाघाती टीका केली.