खड्ड्यांविरोधात काँग्रेसचे मुंब्य्रात आंदोलन

मुंब्रा : येथील नागरी वसाहतीमधून राष्ट्रीय महामार्गाच्या बहुतांशी रस्त्याचे मागील काही वर्षांत काँक्रीटीकरण केले आहे. परंतु, ज्या ठिकाणचे काँक्रीटीकरण केलेले नाही. त्या रस्त्यावर प्रतिवर्षाप्रमाणे यावर्षीदेखील खड्डे पडले आहेत. गणेशोत्सवामध्येही प्रशासनाने त्याची डागडुजी न केल्याने बाप्पांचे आगमन खड्ड्यातून झाले. याचा निषेध करून प्रशासनाचे लक्ष वेधण्यासाठी काँग्रेसने मंगळवारी मुंब्य्रात आंदोलन केले.

पक्षाचे ठाणे शहर अध्यक्ष विक्रांत चव्हाण यांच्या मार्गदर्शनाखाली मंगळवारी शहर उपाध्यक्ष अनिल भगत, भोला पाटील ब्लाँक अध्यक्ष निलेश पाटील, वैशाली भोसले आदींनी रेतीबंदर आणि भारत गिअर परिसरातील रस्त्यावर खड्डे भरो आंदोलन केले. यावेळी ठामपा प्रशासनाच्या विरोधात घोषणा देण्यात आल्या. या प्रतीकात्मक आंदोलनानंतरही प्रशासनाने त्वरित खड्डे न बुजविल्यास तीव्र आंदोलन करण्याचा इशारा भगत यांनी यावेळी दिला.