भिवंडीत पाणीपुरवठा करणाऱ्या नळाला दूषित पाणी

भिवंडी : शहरातील नागरिकांना महापालिकेच्या वतीने पाणीपुरवठा करणाऱ्या नळाला काही दिवसांपासून गढूळ व मातीमिश्रित दूषित पाणी येत आहे. त्यामुळे नागरिकांचे आरोग्य धोक्यात आले आहे. दूषित पाण्यामुळे महिला व मुलांसह नागरिकांना जुलाब - उलट्या यांसारखे आजार भेडसावू लागले आहेत. पालिका प्रशासनाने याकडे लक्ष द्यावे, अशी मागणी होत आहे. मनपा प्रशासनाच्या पाणीपुरवठा विभागाचे या समस्येकडे दुर्लक्ष होत आहे.

अंजूरफाटा, कामतघर, पारनाका बाजारपेठ, कासार आळी, कुंभार आळी, दर्गारोड, आझमीनगर, गौरीपाडा, शांतीनगर, बंगालपुरा, निजामपुरा, गैबीनगर, शांतीनगर, खंडूपाडा, गायत्रीनगर, घुंघटनगर अशा विविध कामगार लोकवस्ती असलेल्या भागात काही दिवसांपासून गढूळ व मातीमिश्रित दूषित पाण्याचा पुरवठा होत आहे. पालिकेच्या पाणीपुरवठा विभागाकडे तक्रारी करूनही दुर्लक्ष केले जात आहे. त्यामुळे नागरिक त्रस्त झाले आहेत. दूषित पाण्यामुळे अनेक महिला, लहान मुले व ज्येष्ठ नागरिकांच्या आरोग्यावर परिणाम हाेत आहे. त्यातच सर्दी - खोकल्याची साथही मोठ्या प्रमाणात वाढली असल्याने आरोग्याच्या समस्यांमुळे नागरिकांना दवाखान्यात उपचारासाठी दाखल व्हावे लागत आहे.

गटारातील पाण्यामुळे दूषित

शहरात पाणीपुरवठा करणारी पाईपलाईन ही मुख्य रस्त्यावरून, तर काही ठिकाणी गटारातून गेलेली आहे. सध्या शहरातील रस्त्यांना खड्डे पडल्याने या रस्त्यांतील नळाच्या फुटलेल्या पाईपलाईनमधून दूषित पाणी पालिकेच्या मुख्य प्रवाहातील जलवाहिनीत जात असल्याने हे पाणी दूषित हाेत आहे. याकडे पालिका आयुक्त सुधाकर देशमुख यांनी लक्ष द्यावे आणि नागरिकांना स्वच्छ पाणीपुरवठा करावा, अशी मागणी भिवंडी जनसंघर्ष समितीच्या वतीने करण्यात आली आहे.