उद्घाटनाआधीच कोपरी पुलास पडले तडे

ठाणे : शहरातील कोपरी पुलाचे काम पूर्णत्वास येत असून लवकरच उद्घाटन होणार आहे. मात्र, मुंबईकडे जाणाऱ्या या पुलावरील लेनवर तडे आणि पुलाखालील भागही कमकुवत असल्याचा प्रकार मनसेने उघडकीस आणला. हा प्रकार लक्षात घेऊन मनसेने एमएमआरडीएकडे आयआयटीमार्फत ऑडिटची मागणी करणारे निवेदन बुधवारी दिले.

या पुलाची पाहणी मंगळवारी मनसेचे ठाणे-पालघर जिल्हाध्यक्ष अविनाश जाधव यांनी केली. यावेळी शहर अध्यक्ष रवींद्र मोरे आणि अन्य पदाधिकारी उपस्थित होते. या पुलाला मध्यभागी तडे गेल्याची तक्रार मनसेकडे संदीप कदम या नागरिकाने केली होती. त्यानुसार मनसेने पाहणी केल्यावर हा धक्कादायक प्रकार समोर आल्याचे जाधव म्हणाले. विशेष म्हणजे पुलाखाली असलेले कपस्टोनही तुटलेले दिसत असून हा भाग कमकुवत झाल्याची माहिती समोर आली. या पुलावरून रोज शेकडो वाहने ये-जा करणार असून अवजड वाहनेही जाणार आहेत. त्यांचा भार हा पूल घेऊ शकणार नाही. या पुलाची दैना पाहता आम्ही उदघाटन होऊ देणार नाही, असा इशारा जाधव यांनी दिला.

-----------------------------

आयआयटीमार्फत जोपर्यंत या पुलाचे ऑडिट होत नाही तोपर्यंत उद्घाटन करू नये. यामध्ये अधिकारी दोषी आहेत. या पुलाची पाहणी करताना नेते आणि अधिकारी होते, त्यांच्या नजरेत ही गोष्ट का आली नाही? या प्रकरणाची चौकशी झाली तर अनेक जण निलंबित होतील.

- अविनाश जाधव