Corona vaccine: मीरा भाईंदरमधील दिव्यांगांसाठी विशेष लसीकरण केंद्र
By ऑनलाइन लोकमत | Published: May 31, 2021 07:06 PM2021-05-31T19:06:08+5:302021-05-31T19:06:15+5:30
मीरा भाईंदरमध्ये केंद्र शासनाकडून लसींचा नियमित पुरवठा होत नसल्याने लसीकरण मोहिम बारगळली आहे.
Corona vaccine: मीरा भाईंदरमधील दिव्यांगांसाठी विशेष लसीकरण केंद्र
मीरारोड - मीरा भाईंदर शहरातील १८ वर्षा वरील दिव्यांगांसाठी महापालिकेने भाईंदर पूर्वेच्या तलाव मार्गावरील पालिका सभागृहात बुधवार २ जून पासून विशेष लसीकरण केंद्र सुरु केले जाणार आहे . मीरा भाईंदरमध्ये केंद्र शासनाकडून लसींचा नियमित पुरवठा होत नसल्याने लसीकरण मोहिम बारगळली आहे. लसीकरण केंद्रांवर गर्दी उसळते . जेणेकरून शहरातील दिव्यांगांना ह्या लसीकरण केंद्रांवर लस मिळणे अवघड झाले आहे.
आयुक्त दिलीप ढोले यांनी सदर बाब लक्षात घेता दिव्यांगां साठी लसीकरणाची स्वतंत्र सुविधा उपलब्ध करून देण्यासाठी निर्देश दिले होते . त्या अनुषंगाने आता भाईंदर पूर्वेच्या तलाव मार्गावरील महापालिकेच्या स्व . मोरेश्वर पाटील भवन येथील तळ मजल्यावर असलेल्या सभागृहात २ जून बुधवार पासून सकाळी १० ते दुपारी ४ ह्या वेळात स्वतंत्र लसीकरण केंद्र सुरु केले आहे . दिव्यांगांना सदर केंद्रात थेट येऊन लस घेता येणार आहे . मीरा भाईंदर शहरातील दिव्यांगां साठीच हे लसीकरण केंद्र असून दिव्यंगत्वाचा शासकीय दाखल आदी पुरावे सोबत आणावे लागणार आहेत .
