CoronaVirus News : मीरा भाईंदर महापालिकेत अत्यावश्यक कामाशिवाय नागरिकांना प्रवेश नाही! 

CoronaVirus News: मीरा भाईंदरमध्ये कोरोना संसर्गाचा कहर उफाळून आला आहे. रुग्णांची संख्या झपाट्याने वाढत असून मृत्यूचे प्रमाण सुद्धा वाढले आहे.

मीरारोड - कोरोना संसर्गाचा वाढता प्रादुर्भाव पाहता मीरा भाईंदर महापालिका कार्यालयात केवळ अत्यावश्यक कामाशिवाय नागरिकांना प्रवेश बंद करण्यात आला आहे . परंतु नगरसेवकां सोबत येणारे लोक तसेच राजकारणी, ठेकेदार आदींना पण प्रवेश बंदी असणार का? असा सवाल नागरिक करत आहेत. (CoronaVirus News: Citizens have no access to Mira Bhayander Municipal Corporation without essential work!)

मीरा भाईंदरमध्ये कोरोना संसर्गाचा कहर उफाळून आला आहे. रुग्णांची संख्या झपाट्याने वाढत असून मृत्यूचे प्रमाण सुद्धा वाढले आहे. त्यातूनच १५ एप्रिलपर्यंतच्या रात्रीच्या संचारबंदी अनुषंगाने महापालिकेच्या कार्यालयात होणारी गर्दी टाळण्यासाठी नागरिकांना प्रवेश बंद केला होता. परंतु अत्यावश्यक कामांसाठी व तक्रारी घेऊन येणाऱ्या नागरिकांना सरसकट बंदी घातल्याने टीकेची झोड उठली. त्यातूनच आता पालिकेने नागरिकांना अत्यावश्यक कामासाठी पालिकेत प्रवेश देण्यास मोकळीक दिली आहे. ज्या विभागामध्ये अत्यावश्यक काम आहे, त्या विभाग प्रमुखाने मुख्य प्रवेशद्वारावरील सुरक्षा रक्षकाकडे प्रवेश पासची व्यवस्था करायची आहे, असे परिपत्रक उपायुक्त संभाजी वाघमारे यांनी सर्व विभाग प्रमुखांसह पदाधिकारी आदींना पाठवले आहे. 

नागरिकांना अत्यावश्यक कामा व्यतिरिक्त प्रवेश बंदी करताना पालिकेत नगरसेवक त्यांच्यासोबत अनेकांना घेऊन जातात. काही राजकीय नेते, पदाधिकारी सुद्धा बेधडक पालिका कार्यालयात तहान मांडतात. ठेकेदार तसेच स्वतःची व्यक्तिगत कामे नसताना पालिकेत फिरणारे दलाल प्रवृतीना रोखणार का? असा सवाल नागरिकां मधून केला जात आहे.