दि.बा. पाटील यांचे नाव देण्याच्या मागणीसाठी मानवी साखळी

ठाणे : नवी मुंबईतील आंतरराष्ट्रीय विमानतळाला दि.बा. पाटील यांचे नाव द्यावे या मागणीकडे सरकारचे लक्ष वेधण्यासाठी गुरुवारी ठाण्यात मानवी साखळी आंदोलन करण्यात आले. कळवा तसेच ठाण्यातील जिल्हाधिकारी कार्यालयाबाहेरदेखील आंदोलन करण्यात आले.

ठाण्यातील कळवानाका येथे नवी मुंबई राष्ट्रीय विमानतळ सर्वपक्षीय कृती समितीचे अध्यक्ष दशरथ पाटील यांच्या नेतृत्वाखाली केलेल्या या आंदोलनात कार्यकर्ते मोठ्या संख्येने सहभागी झाले होते. येत्या २४ जूनपर्यंत याबाबत योग्य निर्णय न झाल्यास सिडकोला घेराव घालण्यात येईल, असा इशारा या वेळी देण्यात आला.

दुसरीकडे जिल्हाधिकारी कार्यालयाजवळ भाजपनेही आंदोलन केले. या वेळी संदीप लेले, राजेश मढवी, प्रतिभा मढवी आदींसह इतर पदाधिकारीदेखील यात सहभागी झाले होते. तसेच दिव्यातही रस्त्याच्या कडेला उभे राहून साखळी आंदोलन करण्यात आले.