पाणीप्रश्नासाठी शिवसेना, मनसेशी चर्चा

बदलापूर : बदलापूर शहरातील पाणी समस्या सोडवण्यासाठी शिवसेना आणि मनसेचे शिष्टमंडळ सोमवारी एकाचवेळी कार्यालयात आले होते. शिवसेनेने आंदोलनाचा तर मनसेने उपोषणाचा इशारा दिला आहे.

शहरात भेडसावणारी पाणी समस्या त्वरित सोडवावी यासाठी शिवसेना शहरप्रमुख वामन म्हात्रे यांनी उपअभियंता राम देवांगर यांची भेट घेऊन त्यांना निवेदन सादर केले, तर शहरातील पाणी समस्या मार्गी लागली नाही तर ४ जुलैपासून मजीप्रा कार्यालयासमोर बेमुदत उपोषणाला बसू, असा इशारा मनसेकडून यावेळी देण्यात आला. मनसेचे कार्यकर्ते मजीप्रा येथे पाणीप्रश्नासाठी आले असता, त्याच वेळेस शिवसेनेचे पदाधिकारीही शहरात भेडसावणाऱ्या पाणीप्रश्नासाठी आले होते. त्यावेळी शिवसेना आणि मनसे एकत्रित बसून अधिकाऱ्यांशी चर्चा केली. यावेळी मनसेच्या महिला शहर प्रमुख संगीता चेंदवणकर, शिवसेना शहरप्रमुख वामन म्हात्रे आणि मनसे, शिवसेनेचे कार्यकर्ते उपस्थित होते.