गणेशोत्सव स्पर्धेचे आज पारितोषिक वितरण; मान्यवरांची उपस्थिती

स्पर्धकांमध्ये उत्सुकता

ठाणे : लोकमत आणि डॉ. राजेश मढवी ठाणे गौरव सेवा प्रतिष्ठान आयोजित ‘युवा गणेश’ सार्वजनिक, घरगुती गणेशोत्सव स्पर्धेचा पारितोषिक वितरण सोहळा शनिवार, १४ सप्टेंबर रोजी गडकरी रंगायतन येथे सकाळी ११ वा. रंगणार असून, यावेळी प्रमुख पाहुणे म्हणून पोलीस आयुक्त विवेक फणसळकर, ठाण्याच्या महापौर मीनाक्षी शिंदे, महापालिका उपायुक्त संदीप माळवी हे उपस्थित राहणार आहेत. याशिवाय, अभिनेत्री जुई गडकरी हिच्यासह भागो मोहन प्यारे या मालिकेतील दीप्ती समेळ व सारिका मेहंदळेही उपस्थित राहणार आहेत. सार्वजनिक गणेशोत्सव स्पर्धेसाठी १०० च्या वर मंडळांनी सहभाग घेतला होता. तसेच घरगुती स्पर्धेसाठी ७० हून अधिक स्पर्धकांनी भाग घेतला होता. त्यामुळे अंतिम सोहळ्यात कोण विजेते ठरणार, याची उत्सुकता सहभागी स्पर्धकांना आहे.

ठाणे शहरातील विविध क्षेत्रांत उल्लेखनीय कामगिरी करणाऱ्या युवकयुवतींना ‘युवारत्न’ पुरस्कारानेही यावेळी सन्मानित करण्यात येणार आहे. ‘लोकमत’च्या वाचकांसह सखी मंच सदस्यांनी कार्यक्रमाला उपस्थित राहण्याचे आवाहन आयोजकांनी
केले आहे.