Dombivali: चुगली लावल्याच्या वादातून मित्रांनी केली मित्राची हत्या; दोघांना अटक

Crime News: दारुवाल्याकडे चुगली लावल्याच्या कारणावरून झालेल्या वादात दोघा मित्रांनी अन्य एका मित्राला लाथाबुक्क्यांनी आणि दांडक्याने जीवे मारुन त्याचा मृतदेह दुसऱ्या मजल्यावरील खिडकीतून खाली फेकल्याची खळबळजनक घटना शुक्रवारी सकाळी नऊच्या सुमारास उघडकीस आली.

- प्रशांत माने

डोंबिवली - दारुवाल्याकडे चुगली लावल्याच्या कारणावरून झालेल्या वादात दोघा मित्रांनी अन्य एका मित्राला लाथाबुक्क्यांनी आणि दांडक्याने जीवे मारुन त्याचा मृतदेह दुसऱ्या मजल्यावरील खिडकीतून खाली फेकल्याची खळबळजनक घटना शुक्रवारी सकाळी नऊच्या सुमारास उघडकीस आली.

 राजेश रामवृक्ष सहानी (वय ३८) असे मृत मित्राचे नाव असून याप्रकरणी दादु मटु जाधव उर्फ पाटील (वय ४५) आणि विनोद पडवळ या दोघांना दोन तासांतच अटक करण्यात मानपाडा पोलिसांना यश आले आहे. हा हत्येचा प्रकार पुर्वेकडील सोनारपाडा गावदेवी मंदिराचे समोरील साईश्रध्दा बिल्डिंग मध्ये घडला. तिघांनाही दारुचे व्यसन होते. रात्रभर तिघेही घरात दारु पित बसले होते. दारुवाल्याकडे चुगली करतो या कारणावरून पहाटेच्या सुमारास वाद झाला. तो विकोपाला गेला आणि दादू आणि विनोदने राजेशला लाथाबुक्क्यांनी मारहाण करीत दांडक्याने त्यांच्यावर प्रहार केले यात राजेश चा जागीच मृत्यू झाला. दरम्यान अपघात होऊन त्याचा मृत्यू झाला असं भासवण्यासाठी त्याला दुसऱ्या मजल्यावरील खिडकीतून खाली फेकले तसेच घरात पडलेले रक्त कपड्याने पुसून पुरावा नष्ट करण्याचा प्रयत्न केला आणि दोघेही घरातून पसार झाले.

दरम्यान शुक्रवारी सकाळी नऊच्या सुमारास एका अनोळखी व्यक्तिचा मृतदेह बिल्डिंगच्या मागे पडला असल्याची माहिती मानपाडा पोलिसांना मिळताच त्यांचं एक पथक घटनास्थळी हजर झाले. प्राथमिक चौकशीत एका घरातून रात्रीच्या सुमारास भांडणाचा आवाज येत होता तसेच घरातील एक व्यक्ती शेजारी राहणाऱ्याकडे दांडका मागण्यासाठी गेला होता अशी माहिती समोर आली. अखेर पोलिसांनी कसोशीने केलेल्या तपासात पसार झालेल्या दादू आणि विनोद या दोघांचा थांगपत्ता लावत त्यांना एका दारूच्या गुत्त्यावरुन अटक केली. डोंबिवलीचे सहाय्यक पोलिस आयुक्त सुनिल कुराडे आणि मानपाडा पोलिस ठाण्याचे वरिष्ठ पोलीस निरीक्षक शेखर बागडे यांच्या मार्गदर्शनाखाली पोलिस अधिकारी आणि कर्मचा-यांना या गुन्ह्याचा छडा लावण्यात यश आले.