रोहित्रातून ऑईल चोरी करताना लागली आग

अग्निशमन दलाच्या जवानांनी आगीवर मिळवलं नियंत्रण

अंबरनाथ : अंबरनाथच्या आनंदनगर एमआयडीसीत रोहित्र अर्थात ट्रान्सफॉर्मरला मंगळवारी रात्री चाेरटे ऑईलची चोरी करीत असताना मोठी आग लागली. एमआयडीसी अग्निशमन दलाने काही वेळातच ती आटोक्यात आणून परिस्थिती नियंत्रणात आणली.

आनंदनगर एमआयडीसी परिसरात क्रेमॉइन्ट नावाची कंपनी असून तिच्या बाजूला महावितरणचा ट्रान्सफॉर्मर आहे. त्याला रात्री ११.३०च्या सुमारास अचानक मोठी आग लागली. सोबतच एक स्फोटसुद्धा झाला. या घटनेची माहिती मिळताच एमआयडीसी अग्निशमन दलाने घटनास्थळी धाव घेऊन ही आग पूर्णपणे आटोक्यात आणून परिस्थिती नियंत्रणात आणली. आग आटोक्यात आल्यानंतर ट्रान्सफॉर्मरची पाहणी केली असता, ती ऑईल चोरताना लागल्याची धक्कादायक बाब समोर आली. ट्रान्सफॉर्मरच्या खालच्या बाजूला ऑईल चोरण्यासाठी प्लास्टिकचे पाईप बसवण्यात आले होते. तसेच ट्रान्सफॉर्मरपासून काही अंतरापर्यंत काही प्लास्टिकचे पाईप टाकून त्याद्वारे ही चोरी केली जात असल्याचे समोर आले. ज्यावेळी ही आग लागली, त्यावेळी ऑईल चोरी करणारे चोरटे ट्रान्सफॉर्मर जवळच उभे होते. मात्र, आग लागताच ते तिथून पळून गेले, अशी माहिती काही प्रत्यक्षदर्शींनी दिली. या घटनेमुळे एमआयडीसी परिसरात रात्रीच्या वेळी पोलिसांनी गस्त वाढवण्याची गरज निर्माण झाली आहे.

----------------------------------------------