वाइन शॉपमध्ये घुसून गोळीबार

भर दुपारी उल्हासनगरच्या मुकेश वाईनमध्ये घुसून पुजारीच्या दोन हस्तकांनी गोळीबार केला. या घटनेमुळे व्यापारी

उल्हासनगर : भर दुपारी उल्हासनगरच्या मुकेश वाईनमध्ये घुसून पुजारीच्या दोन हस्तकांनी गोळीबार केला. या घटनेमुळे व्यापारी, राजकीय नेत्यात भीतीचे वातावरण पसरले असून गुंड सुरेश पुजारीच्या मुसक्या आवळण्याची मागणी सुरू झाली आहे.
पुजारी टोळीने यापूर्वी केबल व्यापारी सच्चिदानंद कारिरा यांची हत्या केली होती. या प्रकरणी ठाण्याच्या खंडणीविरोधी पथकांनी पाच जणांच्या मुसक्या आवळल्या होत्या. त्यानंतरही उल्हासनगरातील नामांकित व्यक्तींना फोन करून खंडणीचे धमकीसत्र गुंड सुरेश पुजारी याने सुरूच ठेवल्याचे या गोळीबाराने उघड झाले. कॅम्प पाचच्या परिसरात विजय रंगलानी यांचे मुकेश वाईन शॉप आहे. दुपारी एकच्या दरम्यान मोटारसायकलवरून आलेल्या दोन हेल्मेटधारी तरूणांनी वाईन शॉपमध्ये प्रवेश केला. काऊंटरवरील मॅनेजरला काही एक न बोलता त्यांनी लिफाफा दिला आणि गोळीबार केला. काही समजण्याच्या आत ते पळून गेले. गोळीबाराच्या घटनेने परिसरात एकच खळबळ उडाली. मॅनेजरला दिलेल्या लिफाफ्यावर आणि आतील कागदावरही सुरेश पुजारी लिहिले होते.
मुकेश वाईनचे मालक विजय रंगलानी आहेत. पण मला एकदाही सुरेश पुजारीचा फोन आला नव्हता, अशी माहिती त्यांनी दिली. पोलिसांनीही त्याचीच री ओढली. हिललाईन पोलीस ठाण्याचे वरिष्ठ पोलीस निरिक्षक मोहन वाघमारे यांनी घटनास्थळी जाऊन परिसरात नाकाबंदी केली. पोलिसांनी दुकानाबाहेरील सीसीटीव्ही कॅमऱ्याचे चित्रीकरण ताब्यात घेऊन तपास सुरू केला. गुन्हे अन्वेषण विभागही तपास करीत आहे. मुकेश वाईनमधील गोळीबारप्रकरणी हिललाईन पोलीस ठाण्यात सुरेश पुजारीसह दोघांवर गुन्हा दाखल केल्याची माहिती वरिष्ठ पोलीस निरीक्षक मोहन वाघमारे यांनी दिली. (प्रतिनिधी)