ठाण्यात लिफ्टमध्ये अडकलेल्या पाच जणांची सुखरुप सुटका

घोडबंदर रोड मानपाडा मधील घटना

ठाणे : घोडबंदर रोडवरील मानपाडा,या ठिकाणी असलेल्या तळ अधिक १५ मजली दोस्ती इम्पिरिया इमारतीच्या पहिल्या मजल्यावरती अचानक लिफ्ट बंद पडली. त्या लिफ्टमध्ये पाच व्यक्ती अडकल्याची घटना रविवारी सायंकाळी ६.३० वाजण्याच्या सुमारास घडली.

अडकलेल्या पाचही ४० ते ४५ मिनिटात सुखरूप सुटका करण्यात अग्निशमन दलाच्या जवानांना यश आले. त्यामध्ये इमारतीमधील राहणारे एका कुटुंबातील चौघांमध्ये दोन चिमुरड्यांचा समावेश असल्याची माहिती ठामपा आपत्ती व्यवस्थापन कक्षाने दिली.

दोस्ती इम्पिरिया या इमारतीच्या लिफ्टमध्ये पाच व्यक्ती अडकल्याची माहिती चितळसर पोलिसांकडून मिळताच घटनास्थळी अग्निशमन दलाचे जवान तसेच आपत्ती व्यवस्थापन कक्षाचे कर्मचारी यांनी धाव घेत बचावकार्य हाती घेतले. लिफ्टमध्ये अडकलेल्या ५४ वर्षीय अब्दुल जब्बार , रेहाना शेख (४५), फैज जब्बार (७ ), फैजान जब्बार (५) आणि एका ४० वर्षीय अनोळखीसह पाच जणांची सुटका करण्यात आली. या घटनेत कोणालाही दुखापत झाली नसल्याची माहिती आपत्ती व्यवस्थापन कक्षाने दिली.