Mira Road: घरकाम करणाऱ्या महिलेची एजंट सह महिलेने केली फसवणूक 

Mira Road: एका महिले कडून दोघा इस्टेट एजंटच्या माध्यमातून घर खरेदी करणाऱ्या घरकाम करणाऱ्या महिलेची फसवणूक झाली आहे . खरेदी केलेल्या घरावर आधीच बँकेचे कर्ज असल्याचे उघडकीस आल्यावर भाईंदर पोलिसांनी महिले विरुद्ध गुन्हा दाखल केला आहे .

मीरारोड -  एका महिले कडून दोघा इस्टेट एजंटच्या माध्यमातून घर खरेदी करणाऱ्या घरकाम करणाऱ्या महिलेची फसवणूक झाली आहे . खरेदी केलेल्या घरावर आधीच बँकेचे कर्ज असल्याचे उघडकीस आल्यावर भाईंदर पोलिसांनी महिले विरुद्ध गुन्हा दाखल केला आहे .

भाईंदर पश्चिमेच्या शिवसेना गल्ली जनता नगर मध्ये दोन मुलांसह राहणाऱ्या सुनंदा सोहान ह्या घरकाम करून कुटुंब चालवतात . त्या राहतात ते घर भाड्याचे होते व कमलेश शाह आणि संजय तिवारी या इस्टेट एजंटनी चार वर्षां पूर्वी ते मिळवून दिले होते . घराची मूळ मालकीण रेणुका पटेल व तिचा पती दिनेशकुमार यांना घर विकायचे होते मात्र ते विकले जात नव्हते . त्यामुळे सुनंदा यांनी घर विकत घेण्याची तयारी दर्शवली व ९ लाख ५० हजारात सौदा ठरला . सुनंदा यांनी भाड्याच्या वेळी अनामत रक्कम म्हणून ३ लाख दिले होते . ती रक्कम वजा करून उर्वरित ६ लाख ५० हजार थोडे थोडे करून त्यांनी दिले.

कमलेश आणि तिवारी यांच्या माध्यमातून रेणुका व दिनेशकुमार पटेल यांनी सुनंदा यांना घर नोंदणी करून विकत दिले .  मात्र काही दिवसांनी बेसिन कॅथॉलिक बँकेचे कर्मचारी आले आणि सदर घरावर ७ लाख १५ हजारांचे कर्ज असल्याचे सांगितले . सुनंदा बँकेत गेल्या असता , सदर घराची मूळ खरेदी करारनामे बँके कडे असताना तुम्हाला खोटी कागदपत्रे देऊन नोंदणी केल्याचे सांगण्यात आले . आपली फसवणूक झाल्याचे स्पष्ट झाल्याने सुनंदा यांनी भाईंदर पोलीस ठाण्यात तक्रार केली . मात्र पोलिसांनी केवळ रेणुका पटेल हिलाच आरोपी केले आहे .