ठाण्यात क्लस्टरचा फायदा मिळविण्यासाठी वृद्धेचे सामान दुकानातून रस्त्यावर टाकले

क्लस्टर योजना लागू झाल्याने दुकान मालक नारायण डायरे यांची मुले सुरेश आणि गुलाब यांनी वत्सला पडवळ यांच्या दुकानाचे टाळे तोडून दुकानात प्रवेश केला. दुकानातील सामान रस्त्यावर टाकल्याने संताप व्यक्त होत आहे.

ठळक मुद्देमालकाचा खटाटोप असल्याचा आरोपवागळे इस्टेट पोलीस ठाण्यात तक्रार४० वर्षांपासून पागडीवर घेतले होते दुकान

ठाणे : तब्बल ४० वर्षे पागडीवर घेतलेल्या किराणा मालाच्या दुकानाचे टाळे तोडून एका ८५ वर्षीय वृद्धेचे सामान रस्त्यावर टाकून दुकानावर कब्जा केल्याचा प्रकार हाजुरी गावात २२ मार्च रोजी रात्री घडला. याप्रकरणी थेट अपर पोलीस आयुक्तांकडे तक्रार केल्यानंतर संबंंधितांविरुद्ध गुन्हा दाखल करण्यात आला आहे.
वत्सला वामन पडवळ (८५), रा. नारायण डायरे चाळ, हाजुरी गाव, ठाणे येथे ५ मार्च १९७९ रोजी ५०० रुपये अनामत रक्कम आणि महिना ६० रुपये भाडेतत्त्वावर पागडीवर १० बाय १० चौरस फुटांचा गाळा पडवळ दाम्पत्याने डायरे यांच्याकडून घेतला. त्याठिकाणी त्यांनी किराणा दुकान सुरू केले. दरम्यान, १८ वर्षांपूर्वी वामन पडवळ यांचे निधन झाले. पतीच्या निधनानंतर वत्सला यांनी दुकान चालू ठेवले. ३५ वर्षांपेक्षा जास्त काळ त्यांनी हे दुकान चालवले. ठाण्यात क्लस्टर योजना लागू झाल्याने मूळ मालक नारायण डायरे यांची मुले सुरेश आणि गुलाब डायरे यांनी २२ मार्च २०१८ रोजी रात्री ११ वाजण्याच्या दरम्यान वत्सला यांच्या दुकानाचे टाळे तोडून दुकानात प्रवेश केला. दुकानातील सामान रस्त्यावर टाकले. दुकानातील रोकड घेऊन दस्तऐवजही चोरले. दुकानावर कब्जा करून डायरे बंधूने दुकानाला टाळे लावले. वत्सला पडवळ यांच्या दुकानाचा १९७९ चा गुमास्ता परवाना तसेच १९८२ या वर्षाची भाडेपावती यात गायब करण्यात आले. सुरुवातीला पोलिसांनी या प्रकरणात तक्रार नोंदवून न घेतल्याने वत्सला यांनी ठाण्याचे अप्पर पोलीस आयुक्त सत्यनारायण चौधरी यांची भेट घेऊन ही कैफियत मांडली. त्यानंतर, वागळे इस्टेट पोलिसांनी २३ मार्च रोजी गुलाब डायरे आणि त्यांच्या दोन मुलांविरोधात गुन्हा दाखल केला. ठाण्यात क्लस्टर योजना लागू झाल्याने भविष्यात चांगले दुकान मिळेल, म्हणून त्यापूर्वीच आपले दुकान दडपशाहीने खाली करून बेरोजगार केले. आता आपले उदरनिर्वाहाचे साधन परत मिळवून द्यावे, अशी मागणी त्यांनी पोलीस यंत्रणेकडे केली आहे.

‘‘वत्सला पडवळ यांची तक्रार त्याच दिवशी नोंदवून घेतली आहे. ज्यांच्याविरुद्ध ही तक्रार आहे, तेही वृद्ध आहेत. त्यामुळे दोघांची बाजू समजून यामध्ये चौकशी करण्यात येत आहे.’’
रवींद्र मालेकर, वरिष्ठ पोलीस निरीक्षक, वागळे इस्टेट पोलीस ठाणे.