देव तारी त्याला कोण मारी! चौथ्या मजल्यावरून पडून चार महिन्यांचा चिमुरडा सुखरूप

हा चिमुरडा खिडकीच्या ग्रीलमधून नेमका खाली कसा पडला? हे मात्र कळले नसल्याची माहिती अख्तर यांनी दिली.

मुंब्रा : चौथ्या मजल्यावरील घराच्या खिडकीच्या ग्रीलमधून खाली पडलेला चार महिन्यांचा चिमुरडा सुखरूप वाचल्याची घटना सोमवारी मुंब्य्रात उघडकीस आली. येथील कौसा भागातील युनिक हाईट्स या इमारतीच्या चौथ्या मजल्यावरील सदनिका क्रमांक ४०३ मध्ये अख्तर चौधरी हे राहतात. त्यांचा चार महिन्यांचा अफ्फान हा चिमुरडा सोमवारी दुपारी खिडकीच्या ग्रीलमधून इमारतीला लागून असलेल्या पत्र्यावर पडला.

एका पत्रकाराच्या मदतीने पालकांनी लगेचच त्याला येथील खासगी रुग्णालयात दाखल केले. तेथील डॉक्टरांनी वैद्यकीय तपासणी करून या चिमुरड्याची प्रकृती स्थिर असून कोणताही धोका नसल्याचे सांगितले. दरम्यान, हा चिमुरडा खिडकीच्या ग्रीलमधून नेमका खाली कसा पडला? हे मात्र कळले नसल्याची माहिती अख्तर यांनी दिली.