श्वानाला शौचास उभे करण्यास विरोध केल्याने बेदम मारहाण

मीरा रोडच्या १२ जणांवर पोलीस ठाण्यात गुन्हा 

मीरा रोड : श्वानास स्टुडिओसमोर शौचास उभे करू नका, असे म्हटले म्हणून १० ते १२ जणांनी जगप्रसिद्ध व्ही अनबिटेबल या नृत्य ग्रुपच्या तिघा सदस्यांना बेदम मारहाण केल्याप्रकरणी मीरा रोड पोलीस ठाण्यात गुन्हा दाखल झाला आहे. 

मीरा रोडच्या लक्ष्मीपार्क भागात   व्ही अनबिटेबल या नृत्य ग्रुपचा स्टुडिओ आहे. २०१५ मध्ये भाईंदरच्या जेसल पार्क खाडीकिनारी नृत्याचा सराव करताना विकास गुप्ता जखमी होऊन त्यांचा मृत्यू झाला होता. त्याच्या सहकारी मित्रांनी विकासच्या नावाने व्ही अनबिटेबल ऑफिशियल इंडिया डान्स  नावाने डान्स ग्रुप तयार केला. विकासचे वडील रमेशचंद गुप्ता (५०) हे या ग्रुपसोबत असतात. 

२१ मार्चच्या रात्री ते ग्रुपचे व्यवस्थापक  विभव गुप्ता यांना रिक्षाने घरी घेऊन जाण्यासाठी थांबले होते.  त्यावेळी अभय कनोजिया याने  श्वानास स्टुडिओसमोर शौचास उभे केले. रमेशचंद्र यांनी हटकले असता राग आल्याने त्याने शिवीगाळ करून त्यांच्या कानाखाली मारून श्वनास तिकडेच शौच करू दिले. 

श्वानास सोडले अंगावर
स्टुडिओतून विभव गुप्तासह मोहम्मद आरीफ आकिल यांनी बाहेर येऊन त्याला समजावण्याचा प्रयत्न केला; परंतु त्याने शिवीगाळ सुरूच ठेवून काही जणांना फोन करून बोलावले. काही वेळातच त्याची आई, भाऊ निर्भय, आयुष, अमित व अन्य साथीदारांनी येऊन तिघांना लथाबुक्क्यांनी व बांबूने मारहाण केली. श्वानास उसकवून विभवच्या अंगावर सोडले. यात श्वानाने चावे घेऊन जखमी केले.