सणासुदीत गटप्रवर्तक, आशांचे रखडलेले पाच महिन्यांचे मानधन; काम बंदचा इशारा

ठाणे : राज्यात गटप्रवर्तक व आशा स्वयंसेविका मार्च २०२० पासून आरोग्य कर्मचाऱ्यांसोबत कोरोनाची कामे करत आहेत. तुटपुंज्या मानधनावर काम करत असतानाही त्यांना वेळेवर मानधन मिळत नसल्याचा आरोप होत आहे. सध्या पाच महिन्यांचे मानधन रखडल्यामुळे त्यांच्या कुटुंबांची उपासमार सुरू आहे. सणासुदीचा कालावधी लक्षात घेऊनही मानधन दिले नाही. आठ दिवसांत मानधन, कोरोना भत्ता, इतर देय मिळालेच पाहिजे, अन्यथा काम बंद आंदोलन छेडण्याचा इशारा त्यांनी रविवारी दिला.

जीव धोक्यात घालून आरोग्यसेवा देणाऱ्या गटप्रवर्तक व अशांना विविध समस्यांना तोंड द्यावे लागत आहे. कोरोना काळात स्वतःसह कुटुंबांचा जीव धोक्यात घालून त्या काम करत आहेत. मात्र काम करूनही शासन प्रशासन पैसे देत नसल्याने त्यांच्यात सरकारबद्दल असंतोष खदखदत आहे, असे महाराष्ट्र राज्य गटप्रवर्तक व आशा स्वयंसेविका संघाचे उपाध्यक्ष भगवान दवणे यांनी सांगितले.

या आर्थिक विवंचनेतून सुटका होण्यासाठी राज्यातील गटप्रवर्तक, आशा स्वयंसेविकांनी जूनमध्ये संपही केला होता. दरम्यान सरकारने गटप्रवर्तकांना एक हजार २०० व कोरोना भत्ता ५०० असे एक हजार ७०० रूपये गटप्रवर्तकांना घोषीत केले आहेत. आशा स्वयंसेविकांना एक हजार रूपये व कोरोना भत्ता ५०० रुपये आदी एक हजार ५०० रुपये वाढ झाली आहे. यास मंत्रिमंडळाने मान्यताही दिली आहे. मात्र शासन आदेश अद्याप काढला नाही. तो ताबडतोब काढण्यात यावा व राज्य सरकारने पाच महिन्यांची थकबाकी व जुलैपासूनचा फरक ताबडतोब द्यावा. केन्द्र सरकारचा बंद केलेला प्रोत्साहन भत्ता सुरू करावा आदी मागण्या केल्या जात आहेत.