महापालिकेच्या सार्वजनिक शौचालयात चालणारी गुटखा विक्री उघडकीस

पोलिसांनी गल्ल्याची तपासणी केली असता त्यात गुटख्याची पाकिटे सापडली .

मीरारोड -  मीरा भाईंदर महानगरपालिकेच्या सार्वजनिक शौचालयात काम करणाऱ्या संस्था चालकाच्या कर्मचाऱ्यास गुन्हे शाखेने बंदी असलेला गुटखा विक्री करण्यासह गुटख्याचा साठा केल्या प्रकरणी ताब्यात घेतले आहे . 

भाईंदर पूर्वेच्या आझाद नगर गल्ली २ मधील महापालिकेच्या माध्यमातून उभारण्यात आलेल्या सुस्वागतम सेवा मंडळ संचालित सार्वजनिक शौचालयातून गुटखा विक्री आणि गुटख्याचा साठा असल्याची माहिती गुन्हे शाखा १ ला मिळाली .  

पोलीस उपायुक्त अविनाश अंबुरे, वरिष्ठ पोलीस निरीक्षक अविराज कुराडे यांच्या मार्गदर्शनाखाली राजु तांबे, संदीप शिंदे,  समिर यादव व विकास राजपूत यांनी पाहणी केली. त्यावेळी शौचालयात गल्ल्यावर बसलेला कर्मचारी नवाब शमशुद्दीन कुरेशी ( ४२ ) हा शौच वा लघुशंकेसाठी येणाऱ्यांना शासनाने प्रतिबंधित केलेला गुटखा विक्री करत असल्याचे आढळून आले . 

पोलिसांनी गल्ल्याची तपासणी केली असता त्यात गुटख्याची पाकिटे सापडली . तसेच तो शौचालयात रहात असलेल्या खोलीत सुद्धा गोणी भरून विविध नावांची गुटख्याची पाकिटे सापडली . पोलिसांनी सुमारे ७४ हजारांचा गुटखा आणि रोख  मिळून एकूण ७७ हजारांचा मुद्देमाल जप्त केला . या प्रकरणी १५ ऑगस्ट रोजी नवघर पोलीस ठाण्यात गुन्हा दाखल करण्यात आला आहे