हाली बरफ हिला तहसीलदार कार्यालयात हंगामी नोकरी

भिवंडी : शहापूर तालुक्यातील शौर्य पुरस्कार विजेती हाली बरफ ही सध्या हलाखीच्या परिस्थितीत जगत आहे. लॉकडाऊनमुळे हंगामी स्वरूपात आश्रमशाळेत मिळालेली नोकरीही आश्रमशाळा बंद असल्याने गेली, तर शिधा वाटपपत्रिकेची ऑनलाइन नोंद नसल्याने तीन महिने धान्यही न मिळाल्याने तिच्या कुटुंबावर उपासमारीची वेळ आली. या संदर्भात वृत्त प्रसिद्ध झाल्याने त्याची दखल घेत भिवंडीचे उपविभागीय अधिकारी डॉ. मोहन नळदकर यांनी शहापूरच्या तहसीलदार कार्यालयात तीन महिन्यांसाठी शिपाई पदावर तिची हंगामी नियुक्ती केली आहे. बुधवारी हाली हिला भिवंडीच्या उपविभागीय अधिकारी कार्यालयात बोलावून नियुक्तीपत्र देऊन तिचा सन्मान केला.

पुरवठा अधिकारी यांच्याशी चर्चा करून तिच्या शिधापत्रिकेची ऑनलाइन नोंदणी होत नाही, तोपर्यंत तिला ऑफलाइन धान्य देण्याचे आदेशही डॉ. नळदकर यांनी दिले आहेत. हाली हिने १२ वर्षांची असताना जंगलात लाकूड घेण्यासाठी गेली असता वाघाने केलेल्या हल्ल्यातून आपल्या बहिणीचे प्राण वाचविले होते. २०१२ मध्ये राष्ट्रीय शौर्य पुरस्कार देऊन गौरविण्यात आले होते; परंतु त्यानंतर अशिक्षित असलेल्या हालीकडे प्रशासन व लोकप्रतिनिधी यांनी सतत दुर्लक्ष केल्याने तिला आपल्या आयुष्यासाठी झगडावे लागले.

अंत्योदय शिधापत्रिका, घरकुल देण्यात आले तर उदरनिर्वाहासाठी आदिवासी प्रकल्पांतर्गत आश्रमशाळेत शिपाई पदावर हंगामी नेमणूक करून तिला मदत केली होती; परंतु लॉकडाऊनमध्ये आश्रमशाळा गेल्या एक वर्षापासून बंद असल्याने तेथील नोकरी तिने गमावली होती. त्यामुळे तिच्यावर पुन्हा एकदा दारिद्र्याचे जीवन जगण्याची वेळ आली होती. यावर उपाय म्हणून ही तीन महिन्यांची हंगामी नोकरी तिला उपविभागीय अधिकारी यांच्या प्रयत्नातून मिळाल्याने हाली हिने समाधान व्यक्त केले आहे.