खांद्यावर हात ठेवत नगरसेवक असल्याचे सांगून लुबाडले

भामट्यांनी आता नगरसेवक असल्याचे सांगून अंगावरील दागिने लुबाडले आहेत.

लोकमत न्यूज नेटवर्क, मीरारोड - एका ५९ वर्षीय इसमाच्या खांद्यावर हात ठेवत आपण येथील नगरसेवक आहोत असे सांगून त्यांच्या गळ्यातील सोन्याची चैन व अंगठी हातचलाखीने लंपास करणाऱ्या दोघा भामट्यांवर भाईंदर पोलिसांनी गुन्हा दाखल केला आहे . आता पर्यंत पोलीस आहोत , पुढे खून झालाय, शेठला मुलगा झाला अशी करणे सांगून लुबाडण्याच्या घटना आहेत . परंतु भामट्यांनी आता नगरसेवक असल्याचे सांगून अंगावरील दागिने लुबाडले आहेत. 

भाईंदर पश्चिमेस फाटक येथील व्यंकटेश पार्क , न्यू टिना टॉवर मध्ये राहणारे कमलेश बाबुलाल शाह हे घरी चालले होते . रुची टॉवर इमारती समोर शाह असताना पांढरा शर्ट घातलेला एक अनोळखी इसम आला आणि शाह यांच्या खांद्यावर हात ठेवला . मला ओळखले का ? मी इथला नगरसेवक आहे असे सांगितले . बाजूने जाणाऱ्या इसमा कडे बोट दाखवत वाटल्यास ह्याला विचार असे त्याने शाह यांना सांगितले . त्या इसमाने देखील हे नगरसेवक असून यांना सर्व ओळखतात असे शाह यांना म्हटले . 

नंतर मात्र त्या भामट्यांनी काय सांगितले हे शाह यांना आठवत नाही. परंतु बोलण्याच्या नादात शाह यांनी त्यांच्या अंगावरील सोन्याची चैन व अंगठी काढून एका इसमास दिली . येथे खूप चोऱ्या होतात त्यामुळे दागिने सांभाळून ठेवा असे म्हणत एकाने शाह यांच्या खिशात ते दागिने ठेवल्या सारखे केले व दोघेही पसार झाले . काहीवेळाने शाह यांनी खिसे तपासले असता दागिने त्यात ठेवलेच नव्हते . साह्य यांच्या फिर्यादी वरून भाईंदर पोलिसांनी गुन्हा दाखल केला असून वरिष्ठ निरीक्षक मुगुट पाटील यांच्या मार्गदर्शनाखाली आरोपींचा शोध सुरु आहे .