‘त्या’ आठ कर्मचाऱ्यांच्या वारसांना पालिका सेवेत नोकरी

मीरा रोड : मीरा भाईंदर महापालिकेच्या कायम सेवेतील आठ कर्मचाऱ्यांचे कोविड किंवा इतर कारणांमुळे निधन झालेल्यांच्या वारसांना शासन नियमानुसार महापालिका सेवेत सामावून घेतले जाणार आहे. नियुक्तिपत्र देण्यापूर्वी त्यांना वैद्यकीय तपासणी प्रमाणपत्र सादर करण्याबाबतचे पत्र महापौर ज्योत्स्ना हसनाळे व आयुक्त दिलीप ढोले यांच्या हस्ते बुधवारी देण्यात आले.

अनुकंपा तत्त्वावर नियुक्तीच्या अनुषंगाने महानगरपालिकेच्या मयत कर्मचाऱ्यांची ८ मार्च व ५ एप्रिल रोजी प्रतीक्षासूची करून एकूण ३० उमेदवारांची यादी प्रसिद्ध करण्यात आली होती. त्यापैकी आठ दिवंगत झालेल्या कर्मचाऱ्यांच्या पात्र नातेवाइकास वारसा अनुकंपा तत्त्वावर महापालिकेत सामावून घेतले जाणार आहे. त्यात कोविडमुळे मयत झालेल्या महापालिकेच्या तीन कर्मचाऱ्यांचे वारस आहेत. कोविड व इतर आजाराने निधन पावलेल्या कर्मचाऱ्यांच्या वारसांमध्ये वैशाली सारुक्ते यांना शिपाई पदावर, सुनीता सोनावणे यांना लिपिक - टंकलेखक, रोशन गावडे यास शिपाई तर सिद्धेश मंजुळे, पौर्णिमा वंजारी, विकास जाधव, मिथुन पवार व सागर केणी या पाच जणांना मजूर पदावर सेवेत सामावून घेतले आहे.

यावेळी उपमहापौर हसमुख गहलोत, स्थायी समिती सभापती दिनेश जैन, सभागृह नेता प्रशांत दळवी, गटनेत्या नीलम ढवण, अतिरिक्त आयुक्त विजयकुमार म्हसाळ, उपायुक्त मारुती गायकवाड, उपायुक्त संजय शिंदे आदी उपस्थित होते.