उल्हास नदी प्रदूषण रोखण्यासाठीची अंमलबजावणी शून्य

कल्याण : उल्हास नदीपात्रात होत असलेले प्रदूषण रोखणे व जलपर्णी काढणे या दोन प्रश्नांवर मी कल्याणकर संस्थेने १८ दिवस नदीपात्रात आंदोलन केले. पालकमंत्र्यांच्या आश्वासनानंतर हे आंदोलन २७ फेब्रुवारी रोजी मागे घेतले गेले. मात्र, त्यावेळी प्रशासनाने दिलेल्या आश्वासनाची अद्याप पूर्तता नाही. त्यामुळे प्रशासनाकडून प्रदूषण रोखण्यासाठीची अंमलबजावणी शून्य असल्याचा आरोप आंदोलक नितीन निकम यांनी केला आहे.

उल्हास नदीचे प्रदूषण रोखण्यासाठी मी कल्याणकर संस्थेच्या वतीने निकम यांच्यासह कैलास शिंदे व उमेश बोरगावकर यांनी आंदोलन केले होते. १८ दिवसांनंतर पालकमंत्र्यांनी त्याठिकाणी भेट दिली. यावेळी महापालिका आयुक्त व जिल्हाधिकारीही उपस्थित होते. पालकमंत्र्यांनी तातडीने जलपर्णी काढण्यासाठी मशीन मागविण्यात यावे, त्यासाठी निविदा काढावी असे आदेश महापालिका आयुक्तांना दिले होते. दरम्यान, मशीन येईपर्यंत मनुष्यबळाचा वापर करून जलपर्णी काढण्याचे सूचित केले होते. मात्र, ते सोपे नाही. जलपर्णी मशीनद्वारे काढण्यासाठी निविदा काढण्यात येणार होती. मात्र, अशी मशीन तयार नसते. ती तयार करण्यासाठी ऑर्डर द्यावी लागते. ही सगळी प्रक्रिया पार पाडण्यात जून महिना उजाडणार असून, तोपर्यंत पावसाळा लागणार आहे. त्यामुळे मशीन मागविण्याची प्रक्रिया वेळखाऊ आहे. मशीनची किंमत ३ कोटींच्या घरात आहे. तात्पुरत्या स्वरूपात भाडेतत्त्वावर मिठी नदीच्या ठिकाणाहून मशीन मागविण्याचा प्रस्ताव आहे. त्यामुळे मशीन मागवून जलपर्णी काढण्याच्या आश्वासनाची पूर्तता होत नसल्याचे दिसून येत आहे. याशिवाय चंद्रशेखर भडसावले या पर्यावरण तज्ज्ञांच्या मदतीने हर्बल फवारणी करून जलपर्णी समूळ नष्ट करण्याचा प्रयत्न केला जावा. त्यासाठी निकम यांनी जिल्हाधिकारी राजेश नार्वेकर यांची भेट घेतली. या भेटीदरम्यान भडसावले यांची मदत घेण्याच्या कामाचे काय झाले याची विचारणा केली. त्यावर नार्वेकर यांनी नदीचे पाणी लाखो लोक पितात. हर्बल फवारणीने रिॲक्शन झाल्यास त्याला जबाबदार कोण, त्याची शहानिशा केल्याशिवाय हा प्रयोग करता येणार नाही, असे मत व्यक्त केले. त्यामुळे मशीनद्वारे जलपर्णी काढणे व हर्बल फवारणी करून समूळ नष्ट करणे ही दोन्ही आश्वासने पूर्ण झालेली नाहीत. आंदोलन मागे घेऊन १६ दिवस उलटले तरी आश्वासनाची पूर्तता झालेली नाही. मग आंदोलन मागे घेण्याचा आग्रह का धरण्यात आला, असा प्रतिप्रश्न निकम यांनी उपस्थित केला आहे. पालकमंत्र्यांची भेट घेऊन निकम हा सगळा प्रकार त्यांना सांगणार आहेत.

--------------------------------