सात एलईडी बसथांब्यांचे उद्घाटन

मुंब्रा : येथील रेतीबंदर सर्कल ते कल्याण फाटादरम्यानच्या रस्ता रुंदीकरणादरम्यान तोडण्यात आलेल्या ३८ पैकी सात एलईडी बसथांब्यांची परिवहन समितीचे सदस्य शमीम खान यांच्या प्रयत्नामुळे पुनर्बांधणी करण्यात आली आहे. त्यांचे उद्‌घाटन शुक्रवारी रात्री गृहनिर्माणमंत्री जितेंद्र आव्हाड यांच्या हस्ते करण्यात आले.

ऊन, पावसात बसची प्रतीक्षा करणाऱ्या प्रवाशांना या थांब्यांमुळे मोठा दिलासा मिळाला आहे. यावेळी आव्हाड यांनी खान हे त्यांना मिळालेल्या पदाचा योग्य वापर करून करीत असलेल्या चांगल्या कामाबद्दल त्यांची प्रशंसा केली. तसेच नुकताच येथून मुंबई सीएसटीदरम्यान सुरू केलेल्या बसचा प्रवास जलद व्हावा, यासाठी ही सेवा बायपासमार्गे चालवण्याचा सल्ला दिला. रस्ता रुंदीकरणाचे काम पूर्ण होताच उर्वरित ३१ बसथांब्यांचीही पुनर्बांधणी करण्यात येणार असल्याची माहिती विरोधी पक्षनेते अशरफ (शानू) पठाण यांनी दिली. यावेळी नगरसेविका सुनीता सातपुते, वृक्ष प्राधिकरण समितीच्या सदस्या संगीता पालेकर, राष्ट्रवादी युवती काँग्रेसच्या जिल्हाध्यक्षा पल्लवी जगताप आदी उपस्थित होते.