महापालिका आयुक्तांचे चौकशीचे आदेश; शिलाई मशीन खरेदी घोटाळा प्रकरण

महिलांना स्वयंरोजगारासाठी म्हणून शिलाई मशीन खरेदीचा ठराव झाल्यानंतर निविदा प्रक्रिया होऊन ३० ऑगस्टला मशीन खरेदीचे कार्यादेश श्री साई श्रद्धा महिला संस्थेला दिले.

मीरा रोड : विधानसभा निवडणुकीच्या तोंडावर पूर्वीच्या धोरणाला परस्पर तीलांजली देतानाच बाजार भावापेक्षा जास्त दराने महिला बालकल्याण समितीने शिलाई मशीन खरेदी केल्याचा प्रकार वादग्रस्त ठरला आहे. ठेकेदाराचा शिलाई मशीन वितरणाचा व्यवसाय नसताना ठेका दिला गेल्याची धक्कादायक प्रकार उघड झाला आहे. याप्रकरणी महापालिका आयुक्त बालाजी खतगावकर यांनी चौकशीचे आदेश दिले असून नोटिस बजावून संबंधितांना खुलासा मागवला आहे.

महिलांना स्वयंरोजगारासाठी म्हणून शिलाई मशीन खरेदीचा ठराव झाल्यानंतर निविदा प्रक्रिया होऊन ३० ऑगस्टला मशीन खरेदीचे कार्यादेश श्री साई श्रद्धा महिला संस्थेला दिले. उषा कंपनीच्या मार्वेला मॉडेलच्या १७० मशीन खरेदीसाठी प्रति मशिन ११ हजार ६०० रुपये ठेकेदारास अदा केले आहेत. त्यासाठी एकूण साडेएकोणीस लाख रुपये खर्च करण्यात आला होता. वास्तविक पूर्वीपासून समितीच्या ठरलेल्या धोरणानुसार प्रत्येक नगरसेवकास त्याच्या प्रभागात एक मशीन गरजू महिलेस वाटप करण्यास दिली जाते.

पालिकेत ९५ नगरसेवक असताना मशीन खरेदी मात्र तब्बल १७० केल्या गेल्या. बहुतांश नगरसेवकांना प्रत्येकी एक शिलाई मशीन देण्यात आली असताना महापौर डिम्पल मेहतांनी मात्र ३० पेक्षा जास्त मशीनचे पत्र देऊ न वाटप केल्या. विधानसभा निवडणूक असल्याने मतदारांना आकर्षित करण्यासाठी सत्ताधारी भाजपने जास्त मशीन खरेदी केल्याचा आरोप होत होता. या मशीन खरेदीत भ्रष्टाचार झाल्याचा आरोप शिवसेना नगरसेविका कुसुम गुप्ता यांनी पत्रकार परिषदेत केला होता. ज्या ठेकेदारास कंत्राट दिले त्यांचा सकस आहार, गणवेश, स्टेशनरी, ज्वेलरी मेकिंगचा व्यवसाय असल्याचे नमूद आहे.

डॉ. सुनील लहाने चौकशी अधिकारी

आयुक्त खतगावकर यांनी निवड समितीतल्या सदस्यांसह संबंधित विभागास नोटीस बजावून खुलासा सादर करण्यास सांगितले आहे. महिला बालकल्याण विभागाचे लिपीक यांचाही उल्लेख नोटिसीत आहे. त्यामुळे विभागासह निवड समिती याप्रकरणी काय खुलासा देते, याकडे सर्वांचे लक्ष लागले आहे. चौकशी अधिकारी म्हणून अतिरिक्त आयुक्त डॉ. सुनील लहाने यांना नियुक्त केले आहे.