केडीएमसीने प्रत्येक विकासकामाचा अनुपालन अहवाल द्यावा

कल्याण : केडीएमसी हद्दीत विकासकामे रखडली असून, ती मार्गी लावली जात नाहीत. कोरोनाकाळात ही कामे कासवगतीने सुरू होती. मात्र, प्रत्येक विकासकामांचा अनुपालन अहवाल द्यावा, अशी मागणी भाजपचे आमदार रवींद्र चव्हाण यांनी आयुक्त डॉ. विजय सूर्यवंशी यांच्याकडे केली आहे.

चव्हाण यांनी शुक्रवारी सूर्यवंशी यांची भेट घेत विविध विकासकामांच्या संदर्भात दोन तास चर्चा केली. यावेळी त्यांनी विकासकामे मार्गी लावण्याचा मुद्दा मांडला. प्रत्येक विकासकाम किती वेळेत पूर्ण करावे, याची मुदत ठरवलेली असते. त्याला अनुपालन अहवाल असे म्हणतात. यावेळी चव्हाण म्हणाले की, बीएसयूपी घरकुल योजनेतील साडेचार हजार लाभार्थ्यांना अद्याप घरांचे वाटप केलेले नाही. त्याचा निर्णय रखडलेला आहे. त्यावर आयुक्तांनी हा विषय तीन महिन्यांत मार्गी लावण्यात येईल, असे सांगितले.

चव्हाण यांनी डोंबिवली स्टेशन परिसरातील मच्छी मार्केटचा विषयही मांडला. या कामाची निविदा काढलेली होती. आता पुन्हा पात्र आणि अपात्रतेचा मुद्दा कसा उपस्थित झाला. रेल्वेनेही या प्रकल्पासाठी जागा देण्याचे मान्य केले होते, याकडे चव्हाण यांनी लक्ष वेधले. त्याचबरोबर ठाकुर्ली रेल्वे उड्डाणपुलाच्या ठाकुर्ली दिशेकडील उन्नत मार्गिकेचे काम अत्यंत संथगतीने सुरू आहे. या कामास गती द्यावी, असे चव्हाण म्हणाले. डोंबिवलीतील एकही एसटीपी कार्यरत नाही. तो कार्यरत करावा. सगळी घाण खाडीत सोडली जात आहे. त्यामुळे खाडी प्रदूषित होत आहे. त्याकडे मनपाच नव्हे तर प्रदूषण नियंत्रण मंडळाचेही दुर्लक्ष होत असल्याचा मुद्दा त्यांनी उपस्थित केला आहे.

मनपाने परदेशी कंपन्यांसोबत करार करून स्मार्ट सिटीअंतर्गत तसेच टीपी स्कीमअंतर्गत काही विकास प्रकल्पांचे प्रस्ताव तयार केले होते. त्याचे पुढे काय झाले असा सवाल चव्हाण यांनी केला. टीपी स्कीम मार्गी लावाव्यात. या स्कीममध्ये लॅण्ड बँक आहेत. त्यांच्या विकासातून मनपाच्या तिजोरीत पैसा जमा होणार आहेत.

‘डॉक्टर, नर्स, अन्य स्टाफ नेमा’

महात्मा फुले आरोग्य योजनेचा लाभ कल्याणच्या श्रीदेवी आणि डोंबिवलीतील एम्स रुग्णालयात मिळत आहे. या योजनेंतर्गत उपचारासाठी सोय केडीएमसीच्या रुग्णालयास अन्य रुग्णालयांतून मिळावी. मनपाच्या रुग्णालयात साधन सामग्री दिली जात असताना त्याच जोडीला डॉक्टर, नर्स अन्य स्टाफ पुरविला गेला पाहिजे, याकडेही चव्हाण यांनी लक्ष वेधले.

-------------------