ठाण्यातून आणखी एका अल्पवयीन मुलीचे अपहरण

ठाण्यातून आणखी एका १६ वर्षीय मुलीचे अपहरण झाल्याची घटना शुक्रवारी घडली.

ठाणे : ठाण्यातून आणखी एका १६ वर्षीय मुलीचे अपहरण झाल्याची घटना शुक्रवारी घडली. याप्रकरणी कासारवडवली पोलीस ठाण्यात तिच्या पालकांनी शनिवारी अपहरणाची तक्रार दाखल केली आहे. गेल्या महिनाभरातील ही चौथी घटना असल्याने पालकवर्गात चिंतेचे वातावरण आहे.
घोडबंदर रोडवरील विजयनगरी भागात राहणारी उर्वशी सिंग ही मुलगी २८ फेब्रुवारी रोजी सायंकाळी ७.३० वाजण्याच्या सुमारास काही कामानिमित्त घराबाहेर पडली होती. ती रात्री उशिरापर्यंत घरी परतलीच नाही. नातेवाइकांकडे तसेच परिसरात शोध घेऊनही ती न मिळाल्याने अपहरणाचा संशय व्यक्त करून तिचे वडील राजू सिंग यांनी कासारवडवली पोलीस ठाण्यात २९ फेब्रुवारी रोजी तक्रार दिली.
मुलीचा रंग सावळा, सडपातळ बांधा, उंची पाच फूट, काळे डोळे, उभट चेहरा, सरळ नाक, लांब काळे केस असून, तिने काळ्या रंगाचा टॉप आणि जीन्स पॅण्ट परिधान केलेली आहे. तिच्याबाबत माहिती असल्यास कासारवडवली पोलिसांशी संपर्क साधण्याचे आवाहन करण्यात आले आहे.
>अन्य दोघींचा शोध सुरूच
याआधी वागळे इस्टेट, विटावा आणि इंदिरानगर भागातूनही तीन अल्पवयीन मुलींचे अपहरण झाल्याच्या घटना घडल्या. वागळे इस्टेट येथील एका १४ वर्षीय मुलीचे अपहरण करून तिच्यावर लैंगिक अत्याचार करणाऱ्या आरोपीस ठाणे गुन्हे अन्वेषण विभागाच्या मध्यवर्ती शोध पथकाने कर्जत (जि. रायगड) येथून १५ फेब्रुवारी रोजी अटक केली. त्याच्या तावडीतून पीडित मुलीची सुटकाही केली. उर्वरित दोन मुलींचा अद्यापही शोध घेण्यात येत असल्याची माहिती सूत्रांनी दिली.