Lodha Luxuria Fire: लोढा लक्सुरियातील मीटर रुमने घेतला पेट; चौथ्या मजल्यापर्यंत धुराचे लोट

आगीवर नियंत्रण मिळविण्यात यश आले आहे. या घटनेची माहिती मिळताच ,एमएसईडीसी अधिकारी, ठाणे महापालिका अग्निशमन दल आणि प्रादेशिक आपत्ती व्यवस्थापन विभागाने घटनास्थळी धाव घेतली.

ठाणे: माजीवडा येथील लोढा लक्सुरिया, वेस्ट गेट 'सी' या तळ अधिक २७ मजली बिल्डिंगच्या तळमजल्यावरील एमएसईडीसीच्या मीटर रूमला आग लागल्याची घटना बुधवारी सकाळी दहा वाजण्याच्या सुमारास समोर आली. यावेळी मोठया प्रमाणात धूर झाल्याने धूर हा चौथ्या मजल्यापर्यंत गेला होता. तर आग पहिल्या मजल्यापर्यंत पोहोचली होती.

या आगीत त्या खोलीतील ८१ मीटर बॉक्स जळून खाक झाले आहेत. या घटनेत कोणतीही जीवितहानी नाही, कोणतीही दुखापत झालेली नाही. या आगीवर नियंत्रण मिळविण्यात यश आले आहे. या घटनेची माहिती मिळताच ,एमएसईडीसी अधिकारी, ठाणे महापालिका अग्निशमन दल आणि प्रादेशिक आपत्ती व्यवस्थापन विभागाने घटनास्थळी धाव घेतली. यावेळी,१-फायर इंजिन आणि १-जंबो वॉटर टँकर पाचारण केले होते. अशी माहिती आपत्ती विभागाने दिली.