यंदाचा शिवजयंती उत्सव साधेपणाने साजरा करण्याचे महापौरांचे आवाहन

ठाणे : कोरोनामुळे उद्भवलेल्या संसर्गजन्य परिस्थितीचा विचार करता या वर्षी तिथीनुसार ३१ मार्च २०२१ रोजी येणारा छत्रपती शिवाजी महाराज जयंती उत्सव अत्यंत साध्या पद्धतीने साजरा करण्याचे आवाहन महापौर नरेश म्हस्के आणि महापालिका आयुक्त डॉ. विपिन शर्मा यांनी केले आहे. शासनाच्या आदेशाला विरोध दर्शविल्यास संबंधितांविरुद्ध आपत्ती व्यवस्थापन कायदा, तसेच साथरोग प्रतिबंधक कायद्याखाली कारवाई करण्याचा इशारा पालिका प्रशासनाने दिला आहे.

महापालिकेने याबाबत मार्गदर्शक सूचना जाहीर केली आहे. त्याचे काटेकोरपणे पालन करण्याचे आवाहनही करण्यात आले आहे. शिवजयंतीच्या दिवशी अनेक शिवप्रेमी किल्ला शिवनेरी अथवा गड तसेच किल्ल्यांवर जाऊन छत्रपती शिवाजी महाराजांच्या जयंती दिनाच्या आदल्या दिवशी मध्यरात्री १२ वाजता एकत्र येऊन शिवजयंती साजरी करतात. परंतु या वर्षी कोरोनाची वाढती रुग्णसंख्या लक्षात घेता कोरोनाचा प्रादुर्भाव टाळण्यासाठी मोठ्या प्रमाणात एकत्र न येता साधेपणाने शिवजयंती उत्सव साजरा करण्याचे आवाहन केले आहे.

दरवर्षी शिवजयंती साजरी करताना संपूर्ण महाराष्ट्रात विविध कार्यक्रमांचे आयोजन केले जाते. परंतु या वर्षी मोठ्या प्रमाणात सार्वजनिक ठिकाणी पोवाडे, व्याख्यान, गाणे, नाटक इत्यादींचे सादरीकरण अथवा इतर सांस्कृतिक कार्यक्रमांचे आयोजन करण्यात येऊ नये. त्याऐवजी या कार्यक्रमांचे केबल नेटवर्क अथवा ऑनलाइन प्रक्षेपण उपलब्ध करून देण्याबाबत व्यवस्था करण्यात यावी, तसेच जयंतीनिमित्त प्रभात फेरी, बाइक रॅली, मिरवणुका काढण्यात येऊ नयेत. त्याऐवजी छत्रपती शिवाजी महाराजांच्या पुतळ्याला अथवा प्रतिमेला पुष्पहार अर्पण करण्याचा कार्यक्रम आयोजित करून त्या ठिकाणी सोशल डिस्टन्सिंगचे पालन करून फक्त १०० व्यक्तींच्या उपस्थितीत शिवजयंती साजरी करण्याची परवानगी देण्यात आली आहे.

* शासनाच्या आदेशाची अंमलबजावणी करण्यास कोणीही टाळाटाळ केल्यास अथवा विरोध दर्शविल्यास संबंधितांविरुद्ध आपत्ती व्यवस्थापन अधिनियम, साथरोग नियंत्रण अधिनियम, १८९७ भारतीय दंड संहिता, कलम १८८ नुसार दंडनीय कायदेशीर कारवाई केली जाणार असल्याचेही प्रशासनाने म्हटले आहे.