बोलण्यात गुंतवून दुकानातून मोबाइल चोरणाऱ्यास अटक

ठाणे : महाशिवरात्रीच्या भंडाऱ्याच्या वर्गणीची बोलणी करण्याचा बहाणा करत मोबाइलची चोरी करणाऱ्या सचिन पोटफोडे (२९, रा. वागळे इस्टेट) याला वागळे इस्टेट पोलिसांनी गुरुवारी पहाटे अटक केली. त्याच्याकडून चोरीतील २१ हजारांचे दोन मोबाइलही हस्तगत केले आहेत.

सचिन याने बुधवारी दुपारी २.४५ ते ३ च्या सुमारास अंबिकानगर क्रमांक दोन येथील पंचपरमेश्वर मंदिराच्या बाजूला असलेल्या प्रतापसिंग राजपूत यांच्या व त्यांच्या शेजारील स्वामीनाथन पिल्ले यांच्या दुकानातून आठ हजार आणि १३ हजारांचे असे दोन मोबाइल त्यांच्या दुकानात येऊन महाशिवरात्री भंडारा वर्गणीच्या नावाखाली बोलण्यात गुंतवून लंपास केले. या दोघांचेही लक्ष विचलित करून हे मोबाइल लंपास केल्याचे त्यांच्या लक्षात येईपर्यंत सचिन तिथून पसार झाला होता.

या प्रकरणी वागळे इस्टेट पोलीस ठाण्यात गुन्हा दाखल झाला होता. वरिष्ठ पोलीस निरीक्षक दत्तात्रय ढोले यांच्या मार्गदर्शनाखाली गुन्हे प्रकटीकरण पथकाने गुरुवारी पहाटे ४ च्या सुमारास सचिनला अटक केली. त्याच्याकडून हे दोन मोबाइल हस्तगत केले असून त्याने आणखीही असे गुन्हे केले आहेत का, याचा शोध घेण्यात येत असल्याचे पोलिसांनी सांगितले.

------------