मॉर्निंग क्लबची राज अकादमीवर १५८ धावांनी मात

ठाणे : स्पोर्टिंग क्लब्स कमिटी, ठाणे आयोजित ठाणे महानगरपालिका क्षेत्र मर्यादित ३४ व्या डॉक्टर श्रीधर दत्तात्रेय देशपांडे स्मृती वासंतिक टी-२० क्रिकेट स्पर्धेस सेंट्रल मैदानावर प्राध्यापिका अनघा देशपांडे यांच्या प्रमुख उपस्थितीत प्रारंभ झाला. शुभारंभाच्या सामन्यात मॉर्निंग क्रिकेट क्लबने राज अकादमीचा तब्बल १५८ धावांनी पराभव करून विजयी सलामी दिली.

विजयी संघातर्फे विकी पाटील ९४, किरण नायडू ५९, पंकज पाटील ३४, फिरोज हाश्मी १३ धावांत तीन बळी, तर स्पर्धेच्या इतिहासातील पहिली महिला खेळाडू दिया इना हिने १३ धावांत एक बळी अशी अष्टपैलू कामगिरी नोंदविली. यावेळी मुंबईच्या स्पोर्ट्स फाउंडेशनतर्फे स्पोर्टिंग क्लबचे क्रिकेटपटू मुकुंद सातघरे यांचा क्लबचे अध्यक्ष डॉक्टर राजेश मढवी यांच्या हस्ते सत्कार करण्यात आला.

याप्रसंगी रणजीपटू संदीप दहाड, अध्यक्ष डॉक्टर राजेश मढवी, अतुल फणसे, सुशील म्हापुस्कर, किशोर ओवळेकर प्रल्हाद नाखवा, शशी नाईक आदी मान्यवर उपस्थित होते. कार्यवाह दिलीप धुमाळ यांनी सूत्रसंचालन केले.

चौकट

धावफलक : मॉर्निंग क्रिकेट क्लब २० षटकांत पाच बाद २४७ (विकी पाटील ९४, किरण नायडू ५९, पंकज पाटील ३४, रियाझ वरेकर ४-०-४४-२) विजयी वि. राज अकादमी १५.३ षटकांत ८९ (अथर्व मिंडे २१, मोहित सिंग २-०-१३-२, फिरोझ हाश्मी ४-२-१३-२). पंच : गुरू कदम- राजन कसबे. गुणलेखक : निखिल पुढारी

-----------------