कामाच्या तणावातून मुंबईतील पोलीस उपनिरीक्षकाची आत्महत्या

कामाच्या तणावातून मुंबई रेल्वेतील पोलीस उपनिरीक्षक धनाजी राऊत (३५) यांनी ठाण्यात आत्महत्या केल्याची घटना सोमवारी सकाळी वर्तकनगर भागात घडली.

ठाणे : कामाच्या तणावातून मुंबई रेल्वेतील पोलीस उपनिरीक्षक धनाजी राऊत (३५) यांनी ठाण्यात आत्महत्या केल्याची घटना सोमवारी सकाळी वर्तकनगर भागात घडली. त्यांच्यामागे पत्नी वनीता आणि दोन मुले असा परिवार आहे.
सकाळी नेहमीप्रमाणे ते व्यायामासाठी बाहेर पडल्यानंतर रेप्टाक्र ॉस कंपनीच्या मैदानात एका झाडाला साडीच्या साहाय्याने गळफास घेतलेल्या अवस्थेत सकाळी ९.३० वाजण्याच्या सुमारास आढळून आले. ही माहिती मिळाल्यानंतर स्थानिकांसह पोलिसांनी त्यांना तातडीने ठाणे जिल्हा शासकीय रुग्णालयात दाखल केले. मात्र, दाखल करण्यापूर्वीच त्यांचा मृत्यू झाल्याचे डॉक्टरांनी सकाळी ११ वाजण्याच्या सुमारास घोषित केले.

ठाणे शहर पोलीस आयुक्तालयात २००६ मध्ये वाहकपदावर भरती झालेल्या धनाजी यांनी २०१६ मध्ये उपनिरीक्षकपदाची परीक्षा उत्तीर्ण केली होती. सध्या ते रेल्वेच्या अंधेरी येथील पोलीस ठाण्यात कार्यरत होते. गेली १३ वर्षे पोलीसमध्ये चालक म्हणून नोकरी केल्यानंतर थेट उपनिरीक्षक म्हणून नोकरी करताना त्यांची खात्यामध्ये मोठी कसरत होत होती. यातूनच ते गेल्या काही दिवसांपासून तणावात होते. तशी हतबलता त्यांनी काही सहकारी आणि आपल्या पत्नीकडेही बोलून दाखवली होती. इतक्या तणावात नोकरी करण्यापेक्षा आपण गावी जाऊन शेती करू, असा सल्लाही त्यांची पत्नी वनीता यांनी त्यांना अगदी दोन ते चार दिवसांपूर्वीच दिला होता, अशीही माहिती ते वास्तव्यास असलेल्या इमारतीमधील काही महिलांनी ‘लोकमत’ला दिली.

वर्तकनगर येथील एमएमआरडीएच्या दोस्ती रेंटलमधील बी-४ या इमारतीमधील नवव्या मजल्यावरील ९१७ क्रमांकाच्या खोलीत राऊत हे पत्नीसह वास्तव्याला होते. तर सुमित (१६) आणि अश्विनी (१३) ही दोन्ही मुले गावी शिकण्यासाठी होती. त्यांची पत्नीही पालघर जिल्ह्यातील देहरे (ता. जव्हार) येथे गेल्या अनेक वर्षांपासून वास्तव्याला होती. ते उपनिरीक्षक झाल्यानंतर त्यांच्या जेवणाची गैरसोय होऊ नये म्हणून त्या दोन महिन्यांपूर्वीच ठाण्यात वास्तव्याला आल्या होत्या. अत्यंत शांत आणि सरळ स्वभावाचे धनाजी इतक्या तणावात असतील, असे कधीच वाटले नाही, असे त्यांच्याच घराच्या बाजूला राहणाऱ्या एका पोलीस कर्मचा-याने सांगितले. त्यांच्या आत्महत्येने त्यांच्या कुटुंबीयांसह संपूर्ण पोलीस वसाहतीमध्ये हळहळ व्यक्त करण्यात येत आहे.

बँकेतील रक्कम केली पत्नीच्या नावाने
धनाजी यांनी अलीकडेच त्यांच्या नावाने बँकेत असलेली सर्व रक्कम पत्नीच्या बँक खात्यावर वळती केली. महिलांना करात सवलत असल्याचे कारण देऊन ही रक्कम वळती केल्याचे त्यांनी सांगितले होते, अशीही माहिती सूत्रांनी दिली. दरम्यान, याप्रकरणी वरिष्ठ पोलीस निरीक्षक संजय गायकवाड अधिक तपास करीत आहेत. राऊत यांना काहीही अडचणी किंवा समस्या असत्या, तर त्यांनी वरिष्ठांशी चर्चा केली असती, तर काही तरी मार्ग काढता आला असता, असे सहायक पोलीस आयुक्त पंकज शिरसाठ यांनी ‘लोकमत’ला सांगितले.

आज डबा उशिरा बनव...

दररोज सकाळी मोकळ्या हवेत फेरफटका मारण्यासाठी जाणाºया धनाजी यांना नियमित व्यायामाची सवय होती. २९ सप्टेंबर रोजी त्यांची साप्ताहिक सुटी होती, तर सोमवारी त्यांना दिवसपाळी होती. आज डबा उशिरा बनव, असे सांगून घरातून पहाटे ४.१५ वाजताच घराबाहेर पडले. सकाळी ९.३० वाजेपर्यंत ते घरी न परतल्यामुळे त्यांच्या पत्नीने शेजारी राहणाºया महाडिक कुटुंबीयांकडे चौकशी सुरू केली. त्यानंतर, काही वेळातच त्यांच्या आत्महत्येची घटना वर्तकनगर पोलिसांना समजली.