मौजमजेकरिता सोनसाखळीसाठी १४ वर्षीय मित्राची हत्या

सोहम बजागे (वय १४ वर्षे) हे मृत अल्पवीयन मुलाचे नाव आहे. अक्षय वाघमारे (वय २४ वर्षे) आणि त्याचा अल्पवयीन साथीदार या प्रकरणात आरोपी आहेत. सोहम हा कल्याण-पडघा मार्गावरील बापगाव येथील जय मल्हारनगरमधील साईराम रेसिडेन्सी येथील इमारतीत कुटुंबासह राहत होता. बुधवारी दुपारच्या सुमारास आरोपींनी सोहमला मोर दाखविण्याच्या बहाण्याने बोलवून त्याला तो राहत असलेल्या परिसरातील एका इमारतीमधील बंद फ्लॅटमध्ये घेऊन गेले. त्यानंतर त्याच्या गळ्यातील सोनसाखळी खेचण्याचा प्रयत्न केला. त्यास सोहमने विरोध केला. त्यामुळे दोघा आरोपींनी त्याची गळा आवळून हत्या करून त्याच्या गळ्यातील दीड तोळ्यांची सोनसाखळी काढली. आरोपींनी त्याचा मृतदेह त्याच ठिकाणी एका सोफ्यात लपवून ठेवला. त्यांनतर दोघांनीही सोहमची सोनसाखळी कल्याणातील एका सोनाराकडे दहा हजार रुपयात गहाण ठेवली. या पैशातून आरोपी उसणे पैसे फेडणार होता. उरलेल्या पैशातून तो मौजमजा करणार असल्याची माहिती पोलिसांना मिळाली आहे.

दरम्यान, बुधवारी दुपारपासून सोहम बेपत्ता असल्याची माहिती त्याच्या कुटुंबासह तो राहत असलेल्या परिसरात वाऱ्यासारखी पसरली. त्यामुळे सायंकाळपासून त्याचा कुटुंबाने शोध घेतला. विशेष म्हणजे आपल्यावर संशय येऊन नये म्हणून या आरोपींनीही कुटुंबासोबत फिरून त्याचा शोध घेण्याचा प्रयत्न केला. अखेर रात्रीच्या सुमारास एका बंद फ्लॅटचा दरवाजा उघडून त्यामध्ये शोध घेतला असता, त्याचा मृतदेह सोफ्यामध्ये आढळून आला. या घटनेची माहिती पडघा पोलिसांना मिळताच पोलिसांनी पंचनामा करून सोहमचा मृतदेह विच्छेदनासाठी भिवंडीतील स्व. इंदिरा गांधी उपजिल्हा रुग्णालयात रवाना केला. नातेवाइकांनी दिलेल्या माहिती व संशयातून सोहमच्या दोघा मित्रांना पडघा पोलिसांनी गुरुवारी ताब्यात घेतले. सोहमच्या हत्येच्या ३ ते ४ दिवसांपूर्वीही आरोपींनी त्याच्या गळ्यातील सोनसाखळीमधील लॉकेट विकून मौजमजा केल्याचे पोलीस तपासात समोर आले आहे.