भिवंडीत अल्पवयीन युवकाची हत्या, काल्हेर खाडीकिनारी मृतदेह गाडून पुरावा नष्ट करण्याचा प्रयत्न

माझ्या मुलाची हत्या करणाऱ्यांना फाशीची शिक्षा व्हावी अशी याचना आई कुसुम शर्मा हिने केली आहे.

भिवंडी : शहरात पूर्ववैमनस्यातून एका अल्पवयीन युवकाची हत्या करून मृतदेह काल्हेर येथील खाडीकिनारी निर्जनस्थळी गाडून पुरावा नष्ट केल्याची घटना उघडकीस आली आहे. या प्रकरणी बुधवारी दोघा युवकांना नारपोली पोलिसांनी ताब्यात घेतले आहे.योगेश रवि शर्मा वय १६ वर्ष, ५ महीने असे हत्या झालेल्या अल्पवयीन युवकाचे नाव आहे. काल्हेर येथील आशापुरा कॉम्प्लेक्स या भागात राहणारा योगेश यास २५ नोव्हेंबर रोजी सायंकाळी काही मित्रांनी काल्हेर येथील रेतीबंदर येथे दारू पिण्यासाठी येत असल्याचे सांगत तेथे चाखण्यासाठी काही घेऊन येण्याचे सांगितले.त्यानंतर योगेश घरातून गेला तो परत आलाच नाही. 

या प्रकरणी कुटुंबीयांनी मुलाचा शोध घेऊन ही न सापडल्याने नारपोली पोलिस ठाण्यात तक्रार दिली असता पोलिसांनी योगेश अल्पवयीन असल्याने अज्ञातां विरोधात अपहरणाचा गुन्हा दाखल केला होता. घटनेचे गांभीर्य पाहून नारपोली पोलिसांनी योगेश पूर्वी राहत असलेल्या कामतघर ब्रह्मानंद नगर येथील काही युवकांसोबत यापूर्वी वाद झाला होता.त्या पूर्ववैमनस्यातून अपहरण झाले असल्याचा संशय कुटुंबीयांनी व्यक्त केला असता पोलिसांनी ब्रह्मानंद नगर कामतघर परिसरातून आयुश विरेंद्र झा वय १९ वर्ष व मनोज नारायण टोपे वय  १९ वर्ष या दोघांना ताब्यात घेऊन कसून चौकशी केली असता त्यांनी धारदार हत्याराने योगेशची हत्या केल्याची कबुली देऊन काल्हेर रेतीबंदर येथील निर्जन गवताच्या ठिकाणी मृतदेह पुरून ठेवल्याचे सांगितले.

नारपोली पोलिसांनी घटनास्थळी अप्पर तहसीलदार गायकवाड,नायब तहसीलदार आदेश म्हात्रे यांच्या उपस्थितीत मृतदेह बाहेर काढून उत्तरीय तपासणीसाठी शासकीय रुग्णालयात रवाना केला आहे. काही दिवसांपूर्वी ब्रह्मानंदनगर येथे माझ्या मुलासोबत भांडण झाले होते. त्या रागातून माझ्या मुलाची हत्या झाली आहे असा झाल आरोप मृतक योगेशची आई कुसुम यांनी केला असून माझ्या मुलाची हत्या करणाऱ्यांना फाशीची शिक्षा व्हावी अशी याचना आई कुसुम शर्मा हिने केली आहे.