नरवीर चिमाजी अप्पांच्या स्मारकामुळे पर्यटनाला चालना

मीरारोड : चौक येथील धारावी किल्ल्यावर नरवीर चिमाजी अप्पा यांचा पुतळा बसवल्यानंतर आता या भागाचे पुरातत्त्व विभागाच्या मार्गदर्शनानुसार सुशोभिकरण करून स्मारक विकसित केले जाईल. यामुळे ऐतिहासिक ठेवा तसेच पर्यटनाच्या दृष्टीने त्याचे महत्त्व वाढणार असल्याचे खासदार राजन विचारे यांनी पाहणी दौऱ्यानंतर सांगितले.

चौक डोंगरावरील २५०० चौ. मी. जागा मीरा-भाईंदर महानगरपालिकेच्या मंजूर विकास आराखड्यात आरक्षित आहे. २००३ मध्ये महासभेत सदर आरक्षण विकसित करण्याचा ठराव मंजूर झाला होता. राज्य शासनाच्या पुरातत्त्व व वस्तू संग्रहालय, संचालनालय यांनी बुरूज, किल्ला व सदरच्या आजूबाजूचा परिसर विकसित करण्यासाठी २००४ ला पाहणी करून स्मारकास परवानगी दिली होती. त्याप्रमाणे बगीचा विकसित करून चिमाजी आप्पांचा अश्वारूढ पुतळा बसविण्यासाठी शासनाकडे परवानगी मागितली. जिल्हाधिकाऱ्यांनी प्रस्ताव १७ मार्च २०११ रोजी शासनास सादर केला. परंतु, कार्यवाहीअभावी १९ वर्षे तो प्रलंबित होता. ही बाब स्थानिक शिवसेना नगरसेविका हेलन जॉर्जी गोविंद यांनी विचारे यांच्या निदर्शनास आणून दिल्यानंतर त्यांनी जिल्हाधिकाऱ्यांकडे यासंदर्भात बैठक घेऊन सुधारित प्रस्ताव सादर करण्याची सूचना केली. त्यानंतर १२ फेब्रुवारी २०२१ रोजी पुतळ्यास मान्यता मिळाल्याचे पत्र मीरा-भाईंदर आयुक्तांना मिळाल्यावर विचारेंनी आपल्या खासदार निधीतून २५ लाख रुपये दिले. आता त्यांनी आमदार गीता जैन, आयुक्त दिलीप ढोले, शहर अभियंता शिवाजी बारकुंड, कार्यकारी अभियंता दीपक खांबित, नगरसेवक हेलन गोविंद जॉर्जी, शर्मिला बगाजींसह पुतळा परिसराची पाहणी केली. यावेळी जिल्हाप्रमुख प्रभाकर म्हात्रे, माजी विरोधी पक्षनेते राजू भोईर व इतर उपस्थित होते.

* विचारेंच्या सूचना

स्मारकाच्या ठिकाणी जुन्या दगडांचे अवशेषांचे पुरातत्त्व विभागाच्या सल्ल्याने जतन करून स्मारकाला संरक्षण द्यावे. या स्मारकातून वसईचा किल्ला समुद्रातून दिसण्यासाठी वाढलेल्या वृक्षांची छाटणी करावी, पुतळ्याच्या देखभालीसाठी हायड्रोलिक यंत्रणा उभारून हायमास्ट व विद्युत रोषणाई करावी, अशा सूचना विचारे यांनी केल्या.