रुग्ण दुपटीचा कालावधी ३२३ दिवसांवर

ठाणे : गेल्या काही दिवसांपासून ठाण्यात कोरोना रुग्णवाढीचा वेग मंदावला आहे. यापूर्वी रुग्णवाढीचा वेग १.५७ टक्क्यांवर होता. तो आता ०.२५ टक्क्यांवर आला असून, रुग्ण दुपटीचा कालावधी हा महिनाभरात ५२ दिवसांवरून थेट ३२३ दिवसांवर गेल्याने ठाणेकरांसाठी ही निश्चितच दिलासादायक बाब म्हणावी लागणार आहे. त्यातही मृत्यूदर रोखण्यातही महापालिकेला यश आले असून, सध्या तो १.४४ टक्क्यांवर आला आहे, तसेच रुग्ण बरे होण्याचे प्रमाण हे रुग्णवाढीपेक्षाही अधिक असल्याचे दिसून आले आहे.

ठाणे महापालिका हद्दीत आतापर्यंत एक लाख २६ हजार ६८७ करोना रुग्ण आढळले आहेत. त्यापैकी एक लाख २१ हजार ४१३ रुग्णांनी कोरोनावर मात केली आहे. त्याचे प्रमाण ९५.८४ टक्के इतके आहे. आतापर्यंत १८३० रुग्णांचा मृत्यू झाला आहे, तर सध्या प्रत्यक्षात शहरात ३ हजार ४४४ रुग्णांवर विविध रुग्णालयांत उपचार सुरू आहेत. यातील १११९ रुग्णांना सौम्य लक्षणे असून, १८६२ रुग्णांना कोणत्याही स्वरूपाची लक्षणे नाहीत. ४६३ रुग्ण क्रिटिकल असून, २९३ आयसीयू आणि १७० रुग्ण व्हेंटिलेटरवर उपचार घेत आहेत. महिनाभरापूर्वी म्हणजेच १६ एप्रिल रोजी शहरात प्रत्यक्ष उपचार घेणाऱ्या रुग्णांची संख्या १६ हजार ५ इतकी होती. त्यावेळेस रुग्ण बरे होण्याचे प्रमाण ८३ टक्के इतके होते; परंतु गेल्या महिनाभरात महापालिकेने केलेल्या उपाययोजनांमुळे संसर्ग कमी झाला असून, रुग्ण बरे होण्याच्या प्रमाणात वाढ होऊन ते आता ९५.८४ टक्के झाले आहे. दुसरीकडे रुग्ण दुपटीच्या कालावधीतदेखील कमालीचा फरक पडला आहे. १६ एप्रिलला हा कालावधी ५२ दिवसांवर होता. महिनाभरात तो आता ३२३ दिवसांवर आला आहे.

तसेच मागील महिनाभरात कोरोनावर मात करणाऱ्या रुग्णांची संख्या नवीन रुग्णांपेक्षा अधिक असल्याचेही दिसून आले आहे. गेल्या १० दिवसांत शहरात तीन हजार ४४९ नवे रुग्ण आढळले असले तरी याच कालावधीत दुप्पट रुग्णांनी म्हणजेच ६ हजार ७६२ रुग्णांनी कोरोनावर मात केली आहे.

तारीख -नवे रुग्ण -बरे झालेले रुग्ण

०९ मे - ४७९ - ९६१

०९ मे - ४०६ - ८५३

१० मे - ३८८ - ६८५

११ मे - २९० - ७२३

१२ मे - ४०९ - ७४६

१३ मे - ३३९ - ५०८

१४ मे - ३२५ - ५४७

१५ मे - ३०६ - ७०६

१६ मे - २७४ - ५९६

१७ मे - २३३ - ४३७

----------------------

एकूण- ३४४९- ६७६२