अंबरनाथच्या वालधुनी नदीवर प्रदूषणाचा फेस

अंबरनाथ शहरातून वाहणाऱ्या वालधुनी नदीवर प्रदूषणाचा फेस जमा झाल्याचे चित्र आज सकाळी पाहायला मिळाले

अंबरनाथ :

अंबरनाथ शहरातून वाहणाऱ्या वालधुनी नदीवर प्रदूषणाचा फेस जमा झाल्याचे चित्र आज सकाळी पाहायला मिळाले अंबरनाथ एमआयडीसीतील रासायनिक कारखान्यांमधून या नदीत रासायनिक सांडपाणी सोडले जात असून त्यामुळेच या नदीत हे रासायनिक प्रदूषण होत असल्याचे पाहायला मिळत आहे.

अंबरनाथ शहरातून वाहणाऱ्या वालधुनी नदीत अनेक वर्षांपासून रासायनिक कारखान्यांकडून सांडपाणी सोडले जाते. या सांडपाण्यामुळे वालधुनी नदीचा रासायनिक नाला झाला असून याचा स्थानिकांना मोठा त्रास होतो. आज सकाळी वालधुनी नदीत प्रदूषणाचा फेस जमा झाल्याचे चित्र पाहायला मिळाले. त्यामुळे स्थानिकांनी संताप व्यक्त केला आहे. वालधुनी नदीत आजवर झालेल्या प्रदूषणानंतर दरवेळी महाराष्ट्र प्रदूषण नियंत्रण मंडळाकडून एमआयडीसीतील रासायनिक कारखान्यांची पाहणी केली जाते. आणि त्यानंतर कारखान्यांना नोटिसा बजावल्या जातात. मात्र यानंतर पुन्हा एकदा कंपन्यांकडून राजरोसपणे नदीत रासायनिक सांडपाणी सोडले जाते. त्यामुळे महाराष्ट्र प्रदूषण नियंत्रण मंडळाच्या एकंदरीत कार्यक्षमतेवरच नव्हे, तर विश्वासार्हतेवर सुद्धा प्रश्नचिन्ह निर्माण झाले आहे.