"... त्या निर्णयानंतर पंतप्रधान आणि मुख्य निवडणूक आयुक्तांना पदावर राहण्याचा नैतिक अधिकार नाही" विनायक राऊतांचा घणाघात

Vinayak Raut: मुख्य निवडणूक आयुक्त अरुण गोयल यांची नियुक्ती बेकायदा असल्याच्या आरोपांवर सर्वोच्च न्यायायच्या निर्णयाने शिक्कामोर्तब झाले असून देशाचे पंतप्रधान नरेंद्र मोदी व गोयल यांना त्यांच्या पदावर राण्याचा नैतिक अधिकार नाही .

- धीरज परब
मीरारोड - मुख्य निवडणूक आयुक्त अरुण गोयल यांची नियुक्ती बेकायदा असल्याच्या आरोपांवर सर्वोच्च न्यायायच्या निर्णयाने शिक्कामोर्तब झाले असून देशाचे पंतप्रधान नरेंद्र मोदी व गोयल यांना त्यांच्या पदावर राण्याचा नैतिक अधिकार नाही . मात्र ते खुर्चीला चिटकून राहतील अशी टीका ठाकरे गटाचे नेते व शिवसेना खासदार विनायक राऊत यांनी मीरारोड येथील शिवगर्जना मेळाव्यात  केली.

मीरा भाईंदर मधील ठाकरे समर्थक शिवसैनिकांचा मेळावा मीरारोड येथे शुक्रवारी रात्री आयोजित करण्यात आला होता . त्यावेळी विनायक राऊत यांनी भाजपा , मुख्यमंत्री शिंदे आदींवर टीका केली . दोन वर्ष महाविकास आघाडी सरकार मध्ये सत्ता भोगून मालमत्ता जमवली तेव्हा बाळासाहेबांच्या हिंदुत्वाला तिलांजली दिली असे वाटले नाही . कोल्ह्या - लांडग्यांच्या गुहेत खासदार राजन विचारे बाळासाहेबांचा भगवा घेऊन ठाम उभे आहेत . ठाणे लोकसभा मतदार संघात स्वतःच्या मुलाला कशाला पाठवताय . हिम्मत असेल तर मुख्यमंत्र्यांनी स्वतः निवडणूक लढवावी . तुमचे डिपोझीट जनता जप्त केल्याशिवाय राहणार नाही . शिंदे गेल्या मुळे ठाण्यात शिवसेनेचे मोठ्या संख्येने पदाधिकारी वाढले आहेत.

धनुष्यबाणाचे पावित्र्य भ्रष्ट करण्याचे प्रयत्न भाजपाच्या माध्यमातून हे गद्दार करत असतील तर तो बाण तुमच्यावर उलटा चालल्याशिवाय राहणार नाही . खोके आणि बोक्यांच्या जीवावर उद्धव ठाकरे यांना एकटे पाडून शिवसेना संपवण्याचे कारस्थान केल्याने देशभरातून संताप व्यक्त होत आहे .  सत्तेचा दुरुपयोग करून देशातल्या ८ राज्यातील सरकारे भाजपाने पाडली. पण हा छत्रपतींचा महाराष्ट्र स्वाभिमानी आहे तो तुम्हाला झुकणार नाही व नमणार नाही हे लक्षात ठेवावे असे राऊत म्हणाले.

खासदार राजन विचारे म्हणाले कि , ठाण्यात कट्टर शिवसैनिकांवर  अगदी चेन स्नॅचिंग पासूनचे खोटे  गुन्हे दाखल केले जात आहेत , त्यांना विविध मार्गाने त्रास देण्याचे प्रकार सुरु आहेत . पण कट्टर निष्ठावंत शिवसैनिक डगमडलेला नाही . छत्रपती  शिवाजी महाराजांनी सर्वजाती धर्माच्या लोकांना सोबत घेऊन हिंदवी स्वराज्य उभारले. आज देखील सर्व जाती धर्माची लोकं आपल्या बरोबर आहेत . लोकांना कळतंय कि अन्याय झालाय व ते निवडणुकीची वाट पहात असून जनता गद्दारांना त्यांची जागा दाखवेल . गेल्या ५७ वर्षात शिवसैनिकांनी जीवाचे रान करून शिवसेना उभारली ती शिवसेना संपवण्याचे पाप गद्दारांनी केले आहे . सत्तेची दडपशाही आणि धनशक्ती चा कितीही वापर केला तरी जनता सहन करत नाही हे कसबा पोटनिवडणुकीत दाखवून दिले आहे.

माजी गटनेत्या नीलम ढवण यांनी आरोप केला कि , मीरा भाईंदर मधील बाळासाहेबांच्या कट्टर शिवसैनिकांना आमिष दाखवले जात आहे , काहींना धमकावले जात आहेत तर काहींवर प्रशासनाला हाताशी धरून बळजबरी कारवाई करायला लावली जात आहे . यावेळी माजी नगरसेवक दिनेश नलावडे , अर्चना कदम , स्नेहा पांडे , जयंतीलाल पाटील , तारा घरत , शर्मिला बगाजी , लक्ष्मण जंगम , प्रियांका करंबळे,  जिल्हाप्रमुख प्रभाकर म्हात्रे , महिला संघटक स्नेहल सावंत , उपजिल्हा प्रमुख धनेश पाटील , मच्छिमार नेते बर्नड डिमेलो,  प्रवक्ते शैलेश पांडे , जयराम मेसे आदी सह पदाधिकारी व शिवसैनिक उपस्थित होते .