लालपरी असुरक्षित; अग्निशमन यंत्र गायब

अजित मांडके

ठाणे : गेल्या काही दिवसांत राज्याच्या काही भागांत एसटीला आग लागल्याच्या किंवा आग लावण्याच्या घटना वाढताना दिसत आहेत. त्या अनुषंगाने ठाण्यातील एसटीच्या तीन मुख्य डेपोंमध्ये जाऊन याची चाचपणी केली असता एसटीच्या लालपरीची अवस्था दयनीय झाल्याचे दिसून आले. शिवशाही बस वगळल्या, तर एसटीच्या एकाही लालपरीत अग्निशमनयंत्र नसल्याचे दिसले. तसेच फस्ट एड बॉक्सही निव्वळ नावापुरते असून, त्यात कोणत्याही प्रकारची प्रथमोपचाराचे एकही औषध नव्हते. त्यामुळे ठाण्यातील लालपरी ही असुरक्षित असल्याचेच या पाहणीत आढळून आले.

एसटीची सेवा ही सर्वसामान्यांसाठी महत्त्वाची मानली जाते. त्यांची अवस्था सुधरवण्यासाठी किंवा प्रवासी वाढविण्यासाठी विविध उपाय केले; परंतु त्याचा फारसा परिणाम झाला नसल्याचेच दिसून आले आहे. त्यातही मागील काही दिवसांत एसटीला आग लागण्याच्या किंवा आग लावण्याच्या घटना वाढताना दिसल्या. असे असूनही ठाण्यातील एसटीमध्ये कुठेही त्या दृष्टिकोनातून सतर्कतेचे उपाय केले नसल्याचेच दिसून आले.

अग्निशमन यंत्रणा गायब

एसटीच्या एकाही लालपरीत अग्निशमन यंत्रणा नसल्याचेच दिसून आले. ते ठेवण्यासाठी खास जागा केली आहे; परंतु त्यात यंत्रच नसल्याचे दिसले. एसटीच्या सर्व लालपरींमध्ये हीच अवस्था असल्याची माहिती एसटी चालक व वाहकांनी दिली.

फस्ट एड बॉक्स नावालाच

एखाद्या वेळेस काही दुर्घटना घडली, तर फस्ट एड बॉक्समधील प्रथोमपचाराची औषधे असणे गरजेचे असते; परंतु एसटी प्रत्येक बसमध्ये हे बॉक्स पूर्णपणे रिकामे आहेत. काही बॉक्स तर फुटलेले तर काही केवळ दोरीने बांधून ठेवल्याचे दिसले. त्यामुळे एखाद्या वेळेस काही दुर्घटना घडली, तर त्याला जबाबदार कोण? असा प्रश्न या निमित्ताने उपस्थित झाला आहे.

वायफाय यंत्रणा गायब

काही वर्षांपूर्वी एसटीचे प्रवासी वाढावेत म्हणून वायफायची सुविधा उपलब्ध करून देण्यात आली होती; परंतु आता ही सेवा इतिहासजमा झाल्याचे वाहक व चालक सांगत आहेत. काही महिने ही सुविधा सुरू होती. त्यानंतर एसटीमधील ही यंत्रणाच गायब झाली आहे.

एसटी आगारात ‘आओ जाओ घर तुम्हारा’

एसटीच्या खोपट, वंदना आणि ठाणे स्टेशन येथील आगारात ‘आओ जाओ घर तुम्हारा’ अशीच अवस्था आहे. या तीनही ठिकाणी बाहेरची खाजगी वाहनेदेखील आत उभी केल्याचे दिसत होते. यात दुचाकींसह चारचाकींचा समावेश होता. कोणी कसाही येत असून, कुठेही बसत आहे. जायचे जरी नसले तरी काही जण डेपोत येऊन चकाट्या पिटताना दिसले.

स्मोकिंग झोन

आगारात सिगारेट किंवा विडी ओढू नये, अशा आशयाचे फलक लावलेले आहेत किंवा रंगरंगोटी केलेली आहे. मात्र, या डेपोमध्ये पाहणीत तशा प्रकारचे वातावरण दिसून आले नाही.

...

अशा घटना रोखण्यासाठी आम्ही संबंधित विभागातील प्रमुखांना सूचना दिल्या आहेत. संशयित किंवा इतर कोणतीही व्यक्ती विनाकारण येत असेल, तर तिची चौकशी करण्याच्या सूचना दिलेल्या आहेत, तसेच काही बसमधील अग्निशमन यंत्रणांची मुदत संपल्याने त्या स्क्रॅप केलेल्या आहेत. नव्याने त्या मिळाव्यात यासाठी संबंधित विभागाकडे पत्रव्यवहार केलेला आहे.

-विनोद भालेराव, विभागीय नियंत्रक, ठाणे

.......

या बसमध्ये अग्निशमन यंत्र नाहीत

ठाणे ते जव्हार - एमएच १४, बीटी ३९७७

ठाणे ते नालासोपारा - एमएच २०, बीएल १०६३

ठाणे ते बोरिवली - एमएच २०, बीएल १४६४

..........

(सर्व छायाचित्रे : अजित मांडके)