Remdesivir: रेमडेसिविर इंजेक्शनचा काळाबाजार थांबविण्याची मागणी; उल्हासनगरवासीयांची थेट जिल्हाधिकाऱ्यांना साकडे

जिल्हाधिकारी राजेश नार्वेकर यांनी रेमडिवीर इंजेक्शनचा तुटवडा असल्याचे मान्य करीत, राज्याला लवकरच साडे लाख रेमडिसीवीर इंजेक्शन उपलब्ध होणार असल्याची माहिती दिली.

सदानंद नाईक 

उल्हासनगर : रेमडेसिवीर इंजेक्शनची मागणी व मर्यादित पुरवठ्यामुळे इंजेक्शनचा काळाबाजार होत असून त्याला आळा घालण्याची मागणी उल्हासनगरवासीयांनी थेट जिल्हाधिकारी यांच्याकडे निवेदनाद्वारे केली. तसेच रेमडेसिवीर इंजेक्शन सर्वसामान्य नागरिकांना उपलब्ध करून देण्याची विनंती केली.

शहरातील रेमडेसिवीर इंजेक्शनचा काळाबाजार थांबविण्यासाठी शासन आदेशाप्रमाणे, महापालिका क्षेत्रातील कोविड रुग्णालयाचीं रेमडीसीविर इंजेक्शनची एकून मागणी महापालिका प्रशासन जिल्हाधिकारी कार्यालयाकडे सादर करणार आहे. त्यानंतर जिल्हाधिकारी कार्यालय मान्यताप्राप्त मेडिकलच्या माध्यमातून कोविड रुग्णांलयांना रेमडेसिवीर इंजेक्शनचा पुरवठा करणार असे ठरले. तसेच रुग्णालयाने रुग्णाच्या नातेवाईकांना चिट्टी देऊन इंजेक्शन मागणीला मनाई केली. असे असतांना सर्वच कोविड रुग्णांलय रुग्णांच्या नातेवाईकांना चिठ्ठी देऊन सर्रासपणे हे इंजेक्शन बाहेरून आणण्यास सांगत आहेत. मनसे अध्यक्ष बंडू देशमुख, कायद्याने वागा लोकचवळीचे अध्यक्ष राज असोडकर, प्रहार जनशक्तिचे ठाणे जिल्हा अध्यक्ष अंँड.स्वप्निल पाटील, समासेवक शिवाजी रगडे आदींनी जिल्हाधिकारी राजेश नार्वेकर यांची भेट घेऊन निवेदन दिले. तसेच रेमडेसिवीर इंजेक्शनचा पुरवठा सुरळीत करा अशी मागणी केली.

जिल्हाधिकारी राजेश नार्वेकर यांनी रेमडेसिवीर इंजेक्शनचा तुटवडा असल्याचे मान्य करीत, राज्याला लवकरच साडे लाख रेमडेसिवीर इंजेक्शन उपलब्ध होणार असल्याची माहिती दिली. सध्या ब्लड प्लाझमा हा कोविड रुग्ण बरे होण्यासाठी संजीवणी ठरत आहे. त्यामुळे जवळपास सर्वच डॉक्टर रुग्णाच्या नातेवाईकाला प्लाझमा आणण्यास सांगत आहेत. यातून प्लाझमा डोनर भेटणे हे देखील अवघड होऊन बसल्याची माहिती उल्हासनगर वासीयांची शिष्टमंडळाने दिली. शासनाने शासकीय, निमशासकीय तसेच खाजगी रूग्णालयात उपचार घेऊन बरे झालेल्या रुग्णांना प्लाझमा दान करण्याकरीता शासनाकडून जनजागृती करावी. अशी सूचना यावेळी शिष्टमंडळाने जिल्हाधिकारी यांना केली.