चक्क रेल्वे फलाटावरच चढवली रिक्षा; मीरारोड येथील घटना

रविवारच्या मध्यरात्री एका रिक्षा चालकाने मीरारोड रेल्वे स्थानकाच्या फलाटावर रिक्षा चढवून नंतर ती तिकीट खिडकी समोरील मोकळ्या जागेत उभी केल्याच्या घटनेने खळबळ उडाली आहे.

मीरारोड - रविवारच्या मध्यरात्री एका रिक्षा चालकाने मीरारोड रेल्वे स्थानकाच्या फलाटावर रिक्षा चढवून नंतर ती तिकीट खिडकी समोरील मोकळ्या जागेत उभी केल्याच्या घटनेने खळबळ उडाली आहे. रेल्वे सुरक्षा बलाने गुन्हा दाखल केला आहे. मध्यरात्री जयराज रामसोच चौहान (४८) रा . महाकाली चाळ, वाकीपाडा, नायगाव ह्याने मीरारोड रेल्वे स्थानकाच्या पूर्व दिशेला रॅम्प वरून फलाट क्रमांक ४ वर रिक्षा नेली. फलाटावरून ती त्याने पालिकेच्या सुशोभीकरण केलेल्या तिकीट खिडकी समोरील आवारात उभी केली. सोमवारी सकाळ पर्यंत रिक्षा तिकडेच उभी होती. 

एम एच ०४ - जे एच ४३६३ असा रिक्षाचा क्रमांक असून रिक्षा चालक असलेला चौहान हा मद्यधुंद अवस्थेत असल्याचे व ह्या आधी देखील त्याने असला प्रकार केल्याचे आरोप त्यावेळी उपस्थितांनी केले. या प्रकरणी भाईंदर रेल्वे सुरक्षा बला ने चौहान याच्यावर गुन्हा दाखल करून त्याला ताब्यात घेतले व नंतर त्याला जामिनावर सोडले. मध्यरात्रीची वेळ असल्याने सुदैवाने कोणाला इजा झाली नसली तरी लोकांमध्ये घबराट माजली होती .